Xitayning bash diplomati amérika hökümitini söhbetlishishke chaqirdi

Muxbirimiz eziz
2023.01.03

Xitayda qaytidin ewjige chiqishqa bashlighan tajsiman wirus ötken üch yildin buyan xitayning iqtisadiy jan tomurini qattiq halsiratqan bolup, buning bir tipik ipadisi xitayning sabiq tashqi ishlar ministiri wang yi otturigha qoyghan “Amérika hökümiti bilen söhbetlishish hemde shu arqiliq chigishlerni yéshish” teklipide eks etti.

Roytéris agéntliqining 1-yanwardiki xewiride éytilishiche, wang yi wezipisidin ayrilghandin kéyin xitay kompartiyesining neshr epkarliridin bolghan “Heqiqetni emeliyettin izdesh” zhurnilining 1-yanwar sanida bash maqale élan qilghan hemde yuqiriqi teklipni otturigha qoyghan. U bash maqalida “Ötken yillarda amérika we xitay izchil öz'ara ep ötüshning yolliri toghrisida izdinip keldi. Ikki terep öz'ara hörmet, tinchliqta bille turush we hemkarliq asasida ish körüsh hemde söhbetlishish asasida amérika-xitay munasiwitini toghra, saghlam we mezmut yolgha sélishi lazim” dégen.

Amérika tashqi ishlar ministiri antoni bilinkén ependi 1-yanwar küni xitayning yéngi tashqi ishlar ministiri chin gang bilen téléfon arqiliq söhbetleshken. U özining tiwittér bétide bu heqte uchur bérip “Biz amérika-xitay munasiwiti hemde öz'ara pikir almashturushning ochuq yolliri heqqide keng-kushade söhbetleshtuq” dégen.

Xewerde éytilishiche, wang yi 2023-yili yétip kélish harpisida wezipisidin ayrilghan bolsimu uning izchil shi jinpingning eng ishenchlik ademlirining biri ikenliki, shundaqla uning téxi yéqindila siyasiy byuro ezaliqigha östürülgenliki tüpeylidin tashqi dunya izchil türde wang yini “Xitay diplomatiye sahesining perde arqisidiki qomandani” dep qarimaqtiken. Derweqe wang yi bu qétim otturigha qoyghan “Söhbetlishish arqiliq mesilini hel qilish” chaqiriqi 2021-yili mart éyida alyaska shtatida ötküzülgen amérika-xitay rehberliri söhbet yighinida xitay hökümiti namayan qilghan tekebburane körenglik bilen roshen sélishturma hasil qilghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.