Хитай қатарлиқ дөләтләр америка сайлимиға арилишишни давам қилмақта

Вашингтондин мухбиримиз җәвлан тәйярлиди
2023.12.19

Американиң 2024-йиллиқ пирезидентлиқ сайлими һазирдин башлап дуняниң диққәт нуқтисиға айлиниватқан бир вәзийәттә, хитай қатарлиқ дөләтләрниң бу сайламға тәсир көрситишкә урунушлири давамлашмақта икән.

CNN Ториниң 18-декабирдики хәвиридә ейтилишичә, башқа дөләтләрниң америкадики 2022-йиллиқ дөләт мәҗлиси сайлимиға арилишиш урунушлири 2018-йилиға қариғанда күчәйгән. Хәвәрдә 18-декабир күни елан қилинған бир мәхпий доклаттин учур берилгән болуп, униңда көрситилишичә, нөвәттә һечқандақ бир дөләт техи 2016-йил русийә қилғандәк “америка сайлимиға омумйүзлүк тәсир көрситиш һәрикити” елип бармиған. Әмма хитай, русийә, иран, куба қатарлиқ дөләтләр бирдәк 2022-йиллиқ америка дөләт мәҗлиси сайлимиға арилишишқа урунған.

Бу доклатта наһайити ишәнчлик һалда “хитай америкадики икки партийәниң оттура мәзгиллик дөләт мәҗлиси әзалири сайлимиға тәсир көрситишкә урунған. Бу бәлки хитай компартийәси рәһбәрлириниң 2020-йилдин буян күчәйтиватқан ‛американиң сиясити вә пикир еқимиға тәсир көрситип, хитайға пайдилиқ муһит яритиш‚ һәрикитиниң нәтиҗисидур” дейилгән.

Америка истихбарат органлириниң қаришичә, хитай әмәлдарлири америка дөләт мәҗлиси әзалири сайлимини пурсәт дәп қариған. Чүнки бу сайламниң шәртлири вә тәкшүрүш өткәллири унчә қаттиқ әмәскән. Хитай тәшвиқатчилири  америкачә демократийәни “қалаймиқан, үнүмсиз вә вәкиллик алаһидиликкә игә әмәс” дәп тәсвирләйдикән һәмдә икки партийәни америка шитатлиридики “һамилә чүшүрүветиш”, “қорал контроллуқи” дегәндәк иҗтимаий мәсилиләр үстидә зиддийәткә селип қоюшқа тиришидикән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.