Xitay qatarliq döletler amérika saylimigha arilishishni dawam qilmaqta

Amérikaning 2024-yilliq pirézidéntliq saylimi hazirdin bashlap dunyaning diqqet nuqtisigha ayliniwatqan bir weziyette, xitay qatarliq döletlerning bu saylamgha tesir körsitishke urunushliri dawamlashmaqta iken.

CNN Torining 18-dékabirdiki xewiride éytilishiche, bashqa döletlerning amérikadiki 2022-yilliq dölet mejlisi saylimigha arilishish urunushliri 2018-yiligha qarighanda kücheygen. Xewerde 18-dékabir küni élan qilin'ghan bir mexpiy doklattin uchur bérilgen bolup, uningda körsitilishiche, nöwette héchqandaq bir dölet téxi 2016-yil rusiye qilghandek “Amérika saylimigha omumyüzlük tesir körsitish herikiti” élip barmighan. Emma xitay, rusiye, iran, kuba qatarliq döletler birdek 2022-yilliq amérika dölet mejlisi saylimigha arilishishqa urun'ghan.

Bu doklatta nahayiti ishenchlik halda “Xitay amérikadiki ikki partiyening ottura mezgillik dölet mejlisi ezaliri saylimigha tesir körsitishke urun'ghan. Bu belki xitay kompartiyesi rehberlirining 2020-yildin buyan kücheytiwatqan ‛amérikaning siyasiti we pikir éqimigha tesir körsitip, xitaygha paydiliq muhit yaritish‚ herikitining netijisidur” déyilgen.

Amérika istixbarat organlirining qarishiche, xitay emeldarliri amérika dölet mejlisi ezaliri saylimini purset dep qarighan. Chünki bu saylamning shertliri we tekshürüsh ötkelliri unche qattiq emesken. Xitay teshwiqatchiliri  amérikache démokratiyeni “Qalaymiqan, ünümsiz we wekillik alahidilikke ige emes” dep teswirleydiken hemde ikki partiyeni amérika shitatliridiki “Hamile chüshürüwétish”, “Qoral kontrolluqi” dégendek ijtima'iy mesililer üstide ziddiyetke sélip qoyushqa tirishidiken.