Aqsaray xitayning chet'el ammiwi teshkilatlirini bashqurush qanunidin “Jiddiy endishe qiliwatimiz” dédi

Xitayning peyshenbe küni chet'el ammiwi teshkilatlirini bashqurush qanunini maqullishi amérika hökümiti, soda menpe'et guruhlirining we xelq'ara kishilik hoquq teshkilatlirining qattiq tenqidige uchridi.

Aqsaray peyshenbe küni bayanat élan qilip, “Amérika hökümiti mezkur qanunning xitayda ammiwi teshkilatlarning pa'aliyet boshluqini téximu taraytiwétishidin, amérika we xitaydiki shexs we ammiwi teshkilatlarning öz - ara alaqisige dexli yetküzüshidin chongqur endishe qilidu” dep körsetti.

Aqsaray bayanatida yene, “Biz xitayni kishilik hoquqqa hörmet qilishqa, kishilik hoquqni qoghdighuchilar, axbaratchilar, tijariy guruhlar, kespiy xadimlar, xitaydiki chet'el ammiwi teshkilatlirini öz ichige alghan barliq ijtima'iy guruhlarning pa'aliyiti, erkinlikige hörmet qilishqa chaqirimiz” dégen.

Kishilik hoquqni közitish teshkilati mezkur qanunda saqchilargha zor hoquq bérilgenlikini, uning xitaydiki chet'el ammiwi teshkilatlirining pa'aliyitini cheklepla qalmay, xitay ammiwi teshkilatlirining pa'aliyitigimu tosqunluq qilidighanliqini bildürdi.

Kishilik hoquq közitish teshkilatining asiya ishlirigha mes'ul diréktori sofiy réchardson bu qanun “Xitayning kishilik hoquq buzghunchiliqini qanunlashturushidiki eng küchlük qoral” dep körsetti.

Biraq, xitay tashqi ishlar ministirliki bayanatchisi xu'a chünying jüme küni bu heqtiki tenqidlerni ret qilip, uning xitayda qanun bilen bashqurushni kücheytidighanliqini ilgiri sürgen. U, “Biz alaqidar döletlerning xitayning qanun chiqirish igilik hoquqigha hörmet qilishini ümid qilimiz” dégen.