Xitay özining 2 - awi'amatkisini yasawatqanliqini étirap qildi

Muxbirimiz erkin
2016-01-01
Share


Xitay peyshenbe küni özining 2 - awi'amatkisini yasawatqanliqini étirap qildi. Xitay dölet mudapi'e ministirliqi bayanatchisi awi'amatkini xitayning özi layiheleydighanliqini we dalyen portida yasilidighanliqini bildürgen.

"Washin'gton pochta géziti" ni jüme künki xewiride, xitayning 2 - awi'amatka qurulushi gherb we xitay bilen jenubiy déngizning igilik hoquqida ixtilapi bar qoshna döletlerde endishe qozghaydighanliqini ilgiri sürdi.

Awi'amatkining su siqip chiqirish miqdari 50 tonna bolup, u xitayning J - 15 tipliq urush ayropilanlirini élip yüridiken. Xitay dölet mudapi'e ministirliqi bayanatchisi yang yajun muxbirlargha bergen bayanatida, "Xitayning uzun déngiz sahili we keng déngiz teweliki bar. Bizning déngiz igilik hoquqimizgha kapaletlik qilish, menpe'etmiz we hoquqimizni qoghdash xitay qoralliq qisimlirining muqeddes wezipisi" dégen.

Xitay jenubiy déngizning istratégiyelik aral we xelq'ara qatnash liniyelirini öz ichige alghan mutleq köp qismida igilik hoquq barliqini dawa qilip kelgen. Emma xitayning igilik hoquq dawasi uning bilen amérika, rayondiki wiyétnam, filippin, malaysiya, birunéy, yaponiye qatarliq döletlerning munasiwitini jiddiyleshtürüwetken.

Xitayning hazirqi "Lyawning" namliq awi'amatkisi sowét ittipaqidin ukra'inagha miras qalghan matorsiz tashlanduq kéme idi. Uni 1998 yili bir xitay sodigiri awménda qimarxana yasaymen, dep sétiwalghan bolsimu, emma u kéme xitaygha kelgende rémont qilinip, awi'amatkisigha özgertilgen.

Xitay dölet mudapi'e bayanatchisi yang yajün 2 - awi'amatkigha da'ir détallar we uning qachan pütüp chiqidighanliqi heqqide héchqandaq uchur bermigen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet