Xitay “Aytoqach bayrimi” ning Uyghur élide buningdin ming yillar burun tebriklen'genlikini ilgiri sürgen

Xitayning ilgiri “Ay seylisi”, “Tawuz chaghini” dégen namlar bilen tonulghan ikki ming yilliq en'eniwi milliy bayramliridin “Aytoqach bayrimi” bu yil yene Uyghur élide keng tebriklenmekte. 2017-Yili bashlan'ghan chong tutqundin béri Uyghurlargha qarita keng yolgha qoyuluwatqan “Jungxu'a milliti ortaq éngi” berpa qilishning bir parchisi süpitide, Uyghurlarningmu xitaylar bilen birlikte tebriklishi mejburiyetke aylan'ghan bu bayramda, bu yilmu “Aytoqach yéyish” bir siyasiy heriketke aylan'ghan. Rayondiki xitay hökümet taratquliridin, Uyghurlarning her qaysi jaylarda omumyüzlük bu bayramni tebriklewatqanliqi, her yili 9-ayning otturiliridin 10-ayning bashlirighiche dawamlishidighan bu bayramni tebriklesh, bayramda aytoqach yéyish Uyghurlarning ming 400 yildin béri tebriklewatqan asasliq milliy bayramliridek teshwiq qiliniwatqanliqi melum bolmaqta. “Shinjang géziti” ning 16-séntebir bergen xewiride, turpan astanadiki bir qedimiy qebridin bir aytoqachning qalduqi bayqalghanliqi, burun turpanda yashighan ahalilerning aytoqach yasap, bu bayramni tebrikligenliki ilgiri sürülgen.

 Xitay hökümiti 2017-yilidin béri rayonda téximu qattiq qolluq bilen ijra qiliwatqan “Jungxu'a milliti ortaq éngi” berpa qilishta, Uyghurlarning noruz, qurban héyt, roza héytqa oxshash héyt bayramlirining chekleshke uchrap, nechche ming yilliq medeniyet en'enilirining xitay medeniyiti boyiche qayta shekillendürülüwatqanliqi qeyt qilinmaqta. “Shinjang géziti” ning bildürüshiche, nöwette Uyghur éli aytoqach keng istémal qilinidighan bir rayonla emes, belki aytoqach ishlepchiqirip xitay ölkilirini teminleydighan bir baza halitige kelgen. “Shinjang géziti” ning bu heqtiki xewiride, “Yéqinqi yillardin béri, shinjang aytoqachlirining en'enige warisliq qilish asasida dawamliq yéngiliq yaritip, rayon alahidiliki bar nurghunlighan yéngi we özgiche temlerni barliqqa keltürgenliki” tekitlen'gen. Emeliyette, “Aytoqach bayrimi” xitay medeniyet chembirikidiki xelqlerning en'eniwi bayrimi bolup, bu bayramning eng burun miladidin burunqi 2-esirdiki xitay yazma wesiqiliride tilgha élin'ghanliqi qeyt qilinmaqta.