S j wérlimen: “Musulmanlarning xitaygha qarshi ortaq bayquti xitayni lagérlarni taqashqa mejburlaydu”

Amérikadiki tonulghan obzorchi we tetqiqatchi s j wérlémen dunyadiki barliq musulmanlarni Uyghurlar üchün heriketke ötüshke chaqirdi.

U, “Ékistra xewerler” namliq tor bette 4-iyul küni maqale élan qilip, Uyghur élidiki musulmanlar uchrawatqan zulumgha se'udi erebistan, pakistan we hetta türkiye qatarliq chong musulman döletlirining rehberliri xitaydin qorqup, süküt qiliwatqan bir peytte wezipining emdi musulman xelqning zimmisige chüshkenlikini eskertken.

S j wérlimenning qarishiche, dunya nopusining 25 pirsentini teshkil qilidighan we nopusi 1 milyard 600 milyondin ashidighan musulman xelqi eger birlikte xitayni iqtisadiy we medeniyet jehettin bayqut qilsa, choqum netijisi chiqidiken. Uning qarishiche, buninggha dunyadiki musulmanlarning isra'iliyege qarshi pelestinni tinchliq yolliri bilen qollash herikiti yaxshi bir ülge bolalaydiken.

S j wérlimen maqaliside, buning üchün dunyadiki barliq musulmanlarning xitay iqtisadida zor tesir küchi bolghan xu'awéy, oppo we wiwo qatarliq shirketlirining mehsulatliri we linowo qatarliq téxnika mehsulatliri shundaqla yene xitayning AirChina , China Eastern qatarliq hawa yollirigha qarita bayqut élan qilishi kéreklikini bildürgen.

U yene, xitay hökümitining Uyghur élidiki musulmanlarni ézishige shérik boluwatqan wolkiswagin, kiraft héynz, adidas qatarliq chet'el markiliriningmu oxshashla bayqut qilinishi kéreklikini eskertken.

U sözide, xitay iqtisadiy dawalghush ichide turuwatqan we amérika hökümitimu xitaygha qarshi bir qisim iqtisadiy jaza tedbirlirini yolgha qoyuwatqan bir peytte, bir yérim milyardtin artuq kishining ortaq herikitining choqum xitay hökümitini Uyghur musulmanlirigha qaratqan mu'amilisini özgertishke, jümlidin yighiwélish lagérlirini taqashqa mejburliyalaydighanliqini bayan qilghan.