Xitayning dölet bayrimi mezgilide Uyghur rayonida 14 ming neper yardemchi saqchi bixeterlik üchün wezipelendürülgen

Washin'gtondin muxbirimiz irade teyyarlidi
2023.10.05

Xitay dölet bayrimi mezgilide Uyghur aptonom rayonluq da'iriler bixeterlikke kapaletlik qilish üchün, 14 ming neper puqrawi yardemchi saqchini wezipilendürgen.

Xitay bashqurushidiki “Tengritagh tori” ning xewirige qarighanda, Uyghur élidiki her derijilik jama'et xewpsizlik organliri we qatnash saqchi tarmaqliri “Dölet bayrimi” mezgilidiki bixeterlik weziyitini közde tutup, 14 ming neper puqrawi yardemchi saqchini nöwetchilik wezipisige qoyghan. Zor sandiki bu yardemchi saqchilar bayram mezgilide xitay ölkiliridin kélidighan sayahetchilerning bixeterliki, shundaqla Uyghur diyaridin qorghas éghizi we bashqa éghizlar arqiliq ottura we gherbiy asiya döletlirige ékisport qilinidighan qatnash wasitilirining bixeterlikini nazaret qilidiken.

Bu zor sandiki yardemchi saqchilar poyiz istansiliri, xelq'araliq qatnash béketliri, sayahet nuqtiliri, ammiwiy sorunlar, soda-saraylar we muhim qatnash tügünliride nöwetchilikte turup, charlash élip baridiken hemde ötken-kechken yoluchilarni tekshüridiken.

Xitay hökümiti 2017-yilidin buyan Uyghur élide keng kölemlik tutqun herikitini élip bérish bilen bilen bir waqitta yene yuqiri téxnikiliq mutleq nazaret hem teqib sistémisini omumlashturghan idi. Mana mushundaq yuqiri bésimliq nazaretke qarimay, xitay da'irilirining bu yilliq dölet bayrimi mezgilide yene 14 ming neper yardemchi saqchini wezipilendürüshi, her sahening küchlük diqqitini qozghimaqta.

“Tengritagh tori” ning xewiride, yuqiriqi bixeterlik tedbirlerning xitay dölet bayrimi mezgilide sayahetchiler we yoluchilarning bixeter aptomobil qollinishi, qistangchiliqning aldini élishni meqset qilghanliqi ilgiri sürülgen bolsimu, biraq buning xitayning Uyghur rayondiki chékidin ashqan bixeterlik tedbirlirining bir qismi ikenliki mölcherlenmekte.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.