Xitay hökümiti bir qisim xelq'araliq bayramlarni qisqartip, xitaylarning en'eniwiy milliy bayramlirini tirildürmektiken

Xitay dölet ishliri kabénti 1-dékabir küni “2017-Yilidiki qismen bayramliq dem élish künliri heqqide uqturush” élan qilghan.

Xelq torining bu heqtiki xewirige qarighanda, 2017-yilidiki bayramliq dem élish künliri pütün xitaydiki ölke, biwaste qarashliq sheher we aptonom rayonlar üchün bir tutash chiqirilghan bolup, uningda milliy téritoriyelik rayonlarning xasliqi we az sanliq milletlerning milliy bayramliri tilgha élinmighan.

Igilinishiche, mezkur uqturushta ilgiri békitilgen bir qisim xelq'araliq bayram künliri qisqartilghan bolup, uning ornigha xitaylarning en'eniwiy milliy bayramliri seplen'gen.

Bolupmu xitaylarning chaghan bayrimi, chokantal bayrimi, tangzongza bayrimi we tawuz chaghini qatarliq en'eniwiy milliy bayramlirigha alahide ehmiyet bérilip, ishchi-xizmetchilerni mexsus dem élishqa qoyup bérish belgilen'gen.

Xelq'ara bayramlardin peqetla yéngi yil küni bilen emgekchiler bayrimi élip qélin'ghan bolup, az sanliq milletler üchün dölet miqyasida ötküzilidighan birermu milliy bayram tilgha élinmighan.

Közetküchiler, xitay hökümitining yéqindin buyan xelq'ara bayramlarning ornigha xitaylarning en'eniwiy bayramlirini seplishi xitayda künsayin ulghiyiwatqan xitay milletchilikining bir roshen ipadisi, dep qarimaqta.