Хитайниң б д т дики “хәтәрлик тәсири” ни ашкарилиған емма райли әнглийә парламентида гуваһлиқ бәргән

Вашингтондин мухбиримиз ирадә тәйярлиди
2024.04.18

Әнглийә парламенти хитай һөкүмитиниң б д т омумий кеңишиниң аз дегәндә икки башлиқиға пара бәргәнлики һәққидики испатларни ашкарилиған. Униңда дейилишичә, б д т кишилик һоқуқ кеңишиниң юқири дәриҗилик әмәлдари хитайниң дәпсәндичиликлири һәққидә гуваһлиқ беришкә тәйярлиниватқан бир қисим уйғур өктичиләр вә башқиларниң исмини тапшуруп бәргән.

16-Апрел күни, б д т кишилик һоқуқ алий комиссарлиқиниң сабиқ хизмәтчиси вә паш қилғучи емма райли (Emma Reilly) әнглийә парламенти ташқи ишлар комитетида гуваһлиқ бәргән болуп, униң гуваһлиқ сөзлири парламент тәрипидин язма шәкилдә елан қилинған.

Емма райли гуваһлиқ сөзидә, кишилик һоқуқ алий комиссарлиқида хитайға “алаһидә муамилә” қилиниватқанлиқини, б д т да “хитайниң өз мәнпәәтини илгири сүрүшигә пайдилиқ болған хәтәрлик вәзийәт барлиқини” ейтқан.

У испатида йәнә, “кишилик һоқуқ кеңишидики фирансийә пуқрасидин болған әмәлдарниң хитайға уйғур паалийәтчиләрниң исмини тапшуруп бәргәнликини, б д т ниң һәр дәриҗилик әмәлдарлириниң болса әза дөләтләргә қәстән ялған ейтип, әмәлийәтни йошурмақчи болғанлиқини” дегән.

Емма райли әнглийә парламентида йәнә, хитай һөкүмитиниң б д т омумий кеңишиниң әмәлдарлириға пара бериш арқилиқ, уларниң сиҗил тәрәққият һәққидики доклатидики мәзмунларға тәсир көрсәткәнлики, б д т органлириға тәйвән билән дипломатик мунасивити бар дөләтләрни мәбләғ билән тәминлимәслик һәққидә мәхпий шәрт қойғанлиқидәк әһвалларни ашкарилиған.

16-Апрел күнидики испат йиғинида йәнә, әнглийәниң ташқи ишлар, ортақ гәвдә вә тәрәққият ишханиси (FCDO) ниң доклатиму бар болуп, улар доклатида “хитай б д т дин ибарәт бу көп тәрәплик системини өз дөлитини мәркәз қилған, мустәбит дуня қаришиға маслаштуруш үчүн һәрикәт қиливатиду” дәп баһалиған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.