Xitayning b d t diki “Xeterlik tesiri” ni ashkarilighan émma rayli en'gliye parlaméntida guwahliq bergen

Washin'gtondin muxbirimiz irade teyyarlidi
2024.04.18

En'gliye parlaménti xitay hökümitining b d t omumiy kéngishining az dégende ikki bashliqigha para bergenliki heqqidiki ispatlarni ashkarilighan. Uningda déyilishiche, b d t kishilik hoquq kéngishining yuqiri derijilik emeldari xitayning depsendichilikliri heqqide guwahliq bérishke teyyarliniwatqan bir qisim Uyghur öktichiler we bashqilarning ismini tapshurup bergen.

16-Aprél küni, b d t kishilik hoquq aliy komissarliqining sabiq xizmetchisi we pash qilghuchi émma rayli (Emma Reilly) en'gliye parlaménti tashqi ishlar komitétida guwahliq bergen bolup, uning guwahliq sözliri parlamént teripidin yazma shekilde élan qilin'ghan.

Émma rayli guwahliq sözide, kishilik hoquq aliy komissarliqida xitaygha “Alahide mu'amile” qiliniwatqanliqini, b d t da “Xitayning öz menpe'etini ilgiri sürüshige paydiliq bolghan xeterlik weziyet barliqini” éytqan.

U ispatida yene, “Kishilik hoquq kéngishidiki firansiye puqrasidin bolghan emeldarning xitaygha Uyghur pa'aliyetchilerning ismini tapshurup bergenlikini, b d t ning her derijilik emeldarlirining bolsa eza döletlerge qesten yalghan éytip, emeliyetni yoshurmaqchi bolghanliqini” dégen.

Émma rayli en'gliye parlaméntida yene, xitay hökümitining b d t omumiy kéngishining emeldarlirigha para bérish arqiliq, ularning sijil tereqqiyat heqqidiki doklatidiki mezmunlargha tesir körsetkenliki, b d t organlirigha teywen bilen diplomatik munasiwiti bar döletlerni meblegh bilen teminlimeslik heqqide mexpiy shert qoyghanliqidek ehwallarni ashkarilighan.

16-Aprél künidiki ispat yighinida yene, en'gliyening tashqi ishlar, ortaq gewde we tereqqiyat ishxanisi (FCDO) ning doklatimu bar bolup, ular doklatida “Xitay b d t din ibaret bu köp tereplik sistémini öz dölitini merkez qilghan, mustebit dunya qarishigha maslashturush üchün heriket qiliwatidu” dep bahalighan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.