Xitay bilen bélorusiye nato döletlirining derwazisi aldida herbiy manéwir ötküzgen

Nato (shimaliy atlantik ehdi teshkilati) qurulghanliqining 75 yilliqi munasiwiti bilen natogha eza döletlerning bashliqliri yighini 9-iyun küni bashlinish aldida, xitay bilen bélorusiye nato, shundaqla yawropa ittipaqining chégrasida birleshme manéwir ötküzgen.

CNN Torining 9-iyul bergen xewirige qarighanda, xitay bilen bélorusiyening 11 künlük birleshme herbiy manéwiri 7-ayning 8-küni bashlan'ghan bolup, bélorusiye-polsha chégrasidiki brést shehirige yéqin meshiq meydanida we minsikning ukra'ina bilen bolghan chégrasidin 40 in'gliz mili yiraqliqta élip bérilidiken. Rusiye ukra'inagha tajawuz qilip ikki yildin köp waqit ötkende élip bérilghan bu manéwir, gi'o-siyasiy bölünüsh we rayonning xewpsizlikige dawamliq tehdit élip  kélidiken.

Xewerde éytilishiche, xitay  dölet mudapi'e ministirliqi 7-ayning 7-küni bayanat bérip,  bu birleshme manéwirning “Tutqunlarni qutquzush herikiti we térrorluqqa qarshi turush wezipisi” ni öz ichige alidighanliqini éytqan.

 “Térorluqqa qarshi turush” namida élip bérilidighan bu manéwirining bashlinishi, ukra'ina pirézidénti wolodimir zélénskining warshawa ziyaritige toghra kelgen bolup, u polshaning bash ministiri donald tusk bilen xewpsizlik kélishimi imzalighan.

Nato we yawropa ittipaqi uzundin buyan bélorusiyeni üchinchi dölettin panahliq tiligüchilerdin paydilinip chégrani qorallandurdi, dep eyiblep kelgen. Bélorusiye ukra'inagha tajawuz qilghan rusiyening muhim ittipaqdishi, shundaqla bu qétim xitayning shangxey hemkarliq teshkilatigha eza bolup kirgen dölet. Xitay kompartiyesining bash sékrétari shi jinping aldinqi hepte qazaqistanda ötküzülgen shangxey hemkarliq teshkilati yighinida bélorusiye pirézidénti lukashénko bilen körüshkende, bélorusiyening shangxey hemkarliq teshkilatigha kirgenlikini alqishlighan bolup, bu ehwal közetküchilerning diqqitini qozghighan؛ shu sewebtin bu birleshme manéwir xitay bilen bélorusiyening birliship, yawropagha, jümlidin natogha eza döletlerge qiliwatqan ighwagerchiliki depmu qaralmaqta iken.