Uyghur rayonidiki basturush heriketlirining emdi yene "Qara küchler" ni tazilash namida dawam qilidighanliqidin bésharet bérilmekte

Muxbirimiz shöhret hoshur
2019-04-10
Élxet
Pikir
Share
Print

Xitayning tengritagh torining xewer qilishiche, xitay merkizi hökümitining atalmish qara küchlerni tazilash we rezillikni tügitish 21-nazaret guruppisi yéqinda Uyghur rayonigha kirip orunlashqan we 9-aprél küni ürümchide seperwerlik yighini achqan.

Uyghur rayonining partkom sékrétari chén chü'en'go seperwerlik sözi qilghan bu yighinda siyasiy orunni yükseldürüsh, muqimliqni mustehkemlesh chaqiriqi tekitlen'gen. Yighinda "Beshni birleshtürüsh" we "Tötni omumlashturush" qatarliq kona sho'arlardin bashqa yene shekli bir'az yéngilan'ghan mesile bayqash, mesile tekshürüsh, mesile tetqiq qilish, mesile bir terep qilish qatarliq sho'arlar qoyulghan.

Uyghur rayonida 2015-yili yézilarda élip bérilghan mesile tapshurush dolqunida yüz minglarche kishi özlirining normal diniy pa'aliyetlirinimu mesile süpitide tapshurushqa mejbur bolghan we türmilerge tashlan'ghan idi. Da'iriler yéqinda kadirlar arisidimu mesile tapshurush herikiti qozghighan we herikettimu bir türküm Uyghur kadirlirining mesilisini özlükidin melum qilghanliqi xewer qilin'ghan idi.

Melum bolushiche, bu qétimqi "Qara küchlerni tazilash" yighinidiki eng yéngi otturigha qoyulghini "Muhapizet künlükini yoqitish" sho'ari bolup, bu sho'arning atalmish ikki yüzlimichilerge qaritilghanliqi perez qilinmaqta. Washin'gtonda yashawatqan siyasiy közetküchi memet sulayman ependi, Uyghur rayonida yéqinqi ikki yilda "Ikki yüzlimichilik" bilen eyiblen'gen Uyghur emeldarlarning xéli bir qismining atalmish "3 Xil küchler" ni qanat astigha alghanliqi yeni ulargha muhapizet künlüki bolup bergenliki üchün jazalan'ghanliqini bayan qildi.

Tengritagh torining xewiride qara jem'iyetke qarshi küresh dolqunining Uyghur rayonida bu yil 8-apréldin 25-mayghiche dawam qilidighanliqi yézilghan.

Toluq bet