Хитай даирилири уйғур елиниң җәнубидики һәр бир кәнткә бирдин "хәлқ ишлири ярдәмчи хадими" орунлаштурған

Мухбиримиз әркин
2020-11-09
Share

Хитай даирилири уйғур елиниң җәнубиға җайлашқан 3 вилайәт вә бир областтики һәр бир кәнткә бирдин "хәлқ ишлири ярдәмчи хадими" орунлаштуруп, һәр бир аилиниң күндилик турмушини техиму илгириләп контроллуқ астиға алған. Хитай таратқулириниң ашкарилишичә, мәзкур "хәлқ ишлири ярдәмчи хадимлири" ниң вәзиписи өйму-өй кирип, аилиләрниң кирим әһвали қатарлиқ турмушидики өзгиришләрни тәкшүрүш туруш икән. Хитай һөкүмити 2017-йилдин башлап милйонлиған уйғурни лагерларға қамаш билән бир вақитта уйғур аилилиригә сиңип киришни күчәйткән иди.

Кишилик һоқуқ тәшкилатлириниң тәкитлишичә, даириләр һәр хил намларда уйғур аилилириниң шәхси турмушиға бөсүп кирип, аилә һаятиниң шәхсий мәхпийәтликигә еғир хилаплиқ қилған. "шинҗаң гезити" ниң 9-ноябир бәргән хәвиридә ашкарилишичә, уйғур аптоном районлуқ хәлқ ишлири назарити йеқинқи 2 йил ичидә җәнубтики 3 вилайәт бир областтики кәнтләргә 3578 нәпәр "хәлқ ишлири ярдәмчи хадими" орунлаштуруп, һәр бир кәнттә бирдин "ярдәмчи" болушни ишқа ашурған.

Хәвәрдә хотәнниң қарақаш наһийәсидики 389 кәнтниң һәр биригә бирдин "ярдәмчи хадим" орунлаштурулуп, "асаси қатламниң хизмәт иқтидари юқири көтүрүлгәнлики" илгири сүрүлгән. Уйғур аптоном районлуқ хәлқ ишлири назаритиниң һәр бир кәнткә бирдин "хәлқ ишлири ярдәмчиси" тәйинләш хизмити 2018-йили учтурпан, қәшқәр йеңишәһәр, ават вә қарақаш қатарлиқ наһийәләрдики 37 кәнттә синақ тәриқисидә башланған иди. Мәлум болушичә, нөвәттә бу җәнубтики 3 вилайәт бир областниң һәммисидә омумлишип болған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт