Xitay da'iriliri Uyghur élining jenubidiki her bir kentke birdin “Xelq ishliri yardemchi xadimi” orunlashturghan

Xitay da'iriliri Uyghur élining jenubigha jaylashqan 3 wilayet we bir oblasttiki her bir kentke birdin “Xelq ishliri yardemchi xadimi” orunlashturup, her bir a'ilining kündilik turmushini téximu ilgirilep kontrolluq astigha alghan. Xitay taratqulirining ashkarilishiche, mezkur “Xelq ishliri yardemchi xadimliri” ning wezipisi öymu-öy kirip, a'ililerning kirim ehwali qatarliq turmushidiki özgirishlerni tekshürüsh turush iken. Xitay hökümiti 2017-yildin bashlap milyonlighan Uyghurni lagérlargha qamash bilen bir waqitta Uyghur a'ililirige singip kirishni kücheytken idi.

Kishilik hoquq teshkilatlirining tekitlishiche, da'iriler her xil namlarda Uyghur a'ililirining shexsi turmushigha bösüp kirip, a'ile hayatining shexsiy mexpiyetlikige éghir xilapliq qilghan. “Shinjang géziti” ning 9-noyabir bergen xewiride ashkarilishiche, Uyghur aptonom rayonluq xelq ishliri nazariti yéqinqi 2 yil ichide jenubtiki 3 wilayet bir oblasttiki kentlerge 3578 neper “Xelq ishliri yardemchi xadimi” orunlashturup, her bir kentte birdin “Yardemchi” bolushni ishqa ashurghan.

Xewerde xotenning qaraqash nahiyesidiki 389 kentning her birige birdin “Yardemchi xadim” orunlashturulup, “Asasi qatlamning xizmet iqtidari yuqiri kötürülgenliki” ilgiri sürülgen. Uyghur aptonom rayonluq xelq ishliri nazaritining her bir kentke birdin “Xelq ishliri yardemchisi” teyinlesh xizmiti 2018-yili uchturpan, qeshqer yéngisheher, awat we qaraqash qatarliq nahiyelerdiki 37 kentte sinaq teriqiside bashlan'ghan idi. Melum bolushiche, nöwette bu jenubtiki 3 wilayet bir oblastning hemmiside omumliship bolghan.