Өткән бир йилда хитайда 35 өлкә вә министирдин юқири дәриҗилик кадир сотқа тартилған

2016-Йили хитайда өлкә вә министирдин юқири дәриҗилик рәһбири кадирдин 35 нәпири үстидин дело турғузулуп, сот йәкүни чиқирилған, буларниң һәммиси парихорлуқ вә хиянәтчилик җинайити билән әйибләнгән.

Бу учурлар бейҗиңда ечиливатқан хитай хәлқ қурултийи, 5-қетимлиқ йиғининиң 3-қетимлиқ омуми йиғинида сөз қилған хитай алий сот мәһкимисиниң башлиқи җов чяңниң доклатидин мәлум болған.

Шинхуа ториниң хәвәрлиридә көрситилишичә, җов чяң доклатида, 2016-йили, һәр дәриҗилик сот мәһкимилириниң хиянәтчиликкә мунасивәтлик 63миң адәмниң 45 миң делоси үстидин сот йәкүни чиқарғанлиқи, буларниң ичидики әйибләнгүчиләрдин 35 адәмниң өлкә вә министирдин юқири дәриҗилик, 240 адәмниң назарәт дәриҗилик кадир икәнликини көрсәткән.

Җов чяң доклатида сабиқ хитай һәрбий ишлар комитетиниң муавин рәиси гу бошоң, мәмликәтлик сиясий кеңәшниң сабиқ муавин рәислири лиң җинхуа, су роң қатарлиқларниң зор делолириниңму барлиқиниму әскәрткән.

Җов чяң сөзидә хиянәтчилик вә парихорлуққа қаттиқ зәрбә бериш позитсийисидә чиң турғанлиқини вә ши җинпиңниң бир қатар муһим сөзлириниң роһи һәм дөләтни қанун билән идарә қилиштики йеңи идийә вә йеңи истратегийиниң әмәлийләштүрүливатқанлиқини тәкитлигән.