Xitayning ishlepchiqirish sahesidiki “Merkez” lik orni yoqilishqa yüzlenmekte

Izchil türde “Dunyaning erzan bahaliq emgek baziri” dep qarilip kéliwatqan xitayning bu sahede “Merkez” bolushtek “Salahiyiti” yéqinqi mezgillerde tedrijiy yoqilishqa yüzliniwatqanliqi melum.

Axios Torining 5-dékabirdiki obzorida éytilishiche, ötken nechche on yilda dunya iqtisad sahesi zor derijide xitaydiki erzan emgek küchlirige béqinip kelgenliki üchün nöwette bu hal herqaysi sahening zor diqqitini qozghashqa bashlighan. Jümlidin “Alma” shirkiti alliqachan bir qisim mehsulat ishlepchiqirish pa'aliyetlirini xitaydin hindistan'gha köchürüp bolghan. Shu qatarda xitayning dunya bazirigha éksport qiliwatqan öy jabduqliri, kiyim-kéchek qatarliq sahelerdiki mehsulatlirimu 2016-yilidin tartip zor derijide töwenleshke bashlighan. Bu sahediki boshluqni bolsa méksika, wiyétnam qatarliq döletler toldurushqa bashlighan. Bu sahediki xelq'ara mutexessislerdin katrina shédlétski (Katrina Shedletsky) muxbirlargha ehwal tonushturup “Hazir hemmila shirket köchüshni oylishiwatidu, hetta téxiche köchüshke da'ir birer herikette bolmighanlarmu shu xiyalda” dégen.

Roytérs agéntliqining 6-dékabirdiki xewiride éytilishiche, en'gliyediki shéfféyil xallam uniwérsitétining proféssori lawra murfiy (Laura Murphy) bashchiliqidiki guruppa shu küni özlirining eng yéngi doklatini élan qilghan. Doklatta xitayning aptomobil sana'itidiki polat, alyumin wetepsiliyhsulatliri, shuningdek batariye we bashqa éléktronluq üskünilirining Uyghurlarning mejburiy emgiki bedilige ishliniwatqanliqi tepsili bayan qilin'ghan. Buning bilen “Aptomobil ishchiliri birleshmisi” (UAW) tézdin dunya aptomobil sahesini bu xildiki “Zamaniwi qullar emgiki” din we uninggha baghlinishliq bolghan teminlesh zenjiridin yiraq bolushqa chaqirghan.

Obzorda éytilishiche, xitay hökümiti méxanik halda ijra qilip kéliwatqan “Wirus yuqumini nölge chüshürüsh” siyasiti bu xil “Köchüsh” tiki bir muhim seweb bolghan. Uningdin bashqa herqaysi chong shirketler we soda dunyasining serkiliri xitayning dunyawi siyasiy-jughrapiye saheside tutqan ornining “Xeter” ge bekrek yüzliniwatqanliqini, shundaqla xitayning nopus qurulmisidiki gheyriylik tüpeylidin kélip chiqqan emgek küchining qimmetlep kétishini qobul qilalmighan. Téximu muhimi xitayning gherb dunyasini düshmen, dep qarishi hemde rusiyening ukra'inagha hujum qilish mesiliside “Tarixning xata teripide turushni tallishi” bu xil “Köchüsh” tiki yene bir muhim seweb, dep qarilishqa bashlighan.