45 Pirsent amérika puqrasi xitayni “Düshmen” dep qarimaqta

Amérika teweside her xil témilar boyiche ray sinashta ortaq étirapqa érishken “Rasmussén doklati” shirkiti yéqinda amérika puqralirining xitay heqqide qandaq qarashta ikenliki sinap körgen. Netijide 45 pirsent amérika puqralirining xitayni “Düshmen” dep qaraydighanliqi melum bolghan.

Ularning 27-yanwardiki doklatida körsitilishiche, ular bu qétim amérika prézidéntliq saylimigha bélet tashlighan kishilerni ray sinash obyékti qilip tallighan. Bu qétim ray sinashqa qatnashqanlardin peqet yette pirsent kishi xitayni “Ittipaqdash” dep qaraydighanliqini éytqan bolsa, 43 pirsent kishi xitayni “Ittipaqdash” bilen “Düshmen” ning arisida, dep qarighan. Halbuki, 2017-yili yanwarda xitayni “Düshmen” dep qaraydighanlar 18 pirsent bolghan iken.

Bu qétimqi ray sinashqa ishtirak qilghanlar ichide jumhuriyetchiler we démokratchilar mutleq köp sanni teshkil qilidighan bolup, ular birdek “Iqtisadiy amil tüpeylidin amérika hökümiti hazirgha qeder xitay sadir qiliwatqan türlük depsendichilik qilmishlirigha süküt qilip kéliwatidu” dep dep qarighan. Bolupmu 65 yashtin ashqanlar ichide mushu xil pikirge mayillar birdek köp bolghan.

Melum bolushiche, amérika-xitay munasiwitidiki yiriklishishte xitay terepning eqliy mülük oghriliqi, tajsiman wirus (kowid) yuqumi we xitayning ukra'inagha tajawuz qiliwatqan rusiyeni maddiy jehettin qollishi qatarliqlarmu xitay heqqidiki selbiy qarashni ashurghan muhim amillardin, dep qaralghanliqi melum. Bu xildiki xitayni “Düshmen” dep qarash xahishi 2024-yili “Pyu” (Pew) tetqiqat merkizining ray sinash pa'aliyitidimu mushu shekilde melum bolghan idi.