Xitay elchisi: türkiyening Uyghur mesilisidiki pozitsiyesi iqtisadiy munasiwetlerge ziyanliq

Xitayning türkiyede turushluq bash elchisi türkiyening xitayni Uyghur mesiliside eyiblishi “Iqtisadiy munasiwetlerge ziyan yetküzidu”, dep agahlandurghan.

Roytérs agéntliqining xewer qilishiche, xitayning türkiyede turushluq bash elchisi déng li mezkur agéntliqning ziyaritini qobul qilghanda, ikki dölet munasiwetliride körülidighan uqushmasliq we ziddiyetlerning di'alog arqiliq hel qilinishi kéreklikini, qarshi terepni ochuq-ashkara tenqid qilishning toghra usul emeslikini éytqan.

U sözide: “Eger siz ijabiy bolmighan usulni tallisingiz, u halda ikki dölet arisidiki öz-ara ishench, chüshinishke tesir yétip, netijide bizning soda we iqtisadiy munasiwetlirimizge ziyan béridu” dégen.

Türkiye hökümiti 2 yilliq süküttin kéyin, axiri ötken ayda bayanat élan qilip, xitay hökümitini Uyghur élide yolgha qoyghan jaza lagérlirini taqashqa chaqirghan idi. Türkiye tashqi ishlar ministiri mewlüt chawush'oghlumu 25‏-féwral küni b d t kishilik hoquq kéngishining 40‏-nöwetlik yighinida sözligen nutqida türkiyening meydanini yene bir qétim otturigha qoyup: “Xitay hökümiti térrorchilar bilen bigunah insanlarni perqlendürüshi kérek” dégen.

Türkiyening meydani xitayni qattiq narazi qilghan idi. Xitayning tashqi ishlar bayanatchisi lukang buninggha qayturghan inkasida türkiyeningmu térrorluq tehditi astidiki döletlikini pesh qilip, “Eger türkiye térrorluqqa qarshi turushta ‛ikki xil ölchem‚ qollansa, u bashqilargha ziyan sélish bilen teng özigimu ziyan salidu” dégen.

Xitayning türkiyede turushluq bash elchisi déng li bügünki sözide bolsa türkiyeni iqtisad arqiliq tehdit qilip, “Yaxshi diplomatik munasiwet iqtisadiy munasiwetlerning tereqqiyati üchün kem bolsa bolmaydighan amil” dégen.