Хитайниң җилин өлкисидики юқири дәриҗилик бир әмәлдар уйғур райониға йөткәп келинди

Хитайниң җилин өлкисидики юқириқи дәриҗилик бир әмәлдари йеқинда уйғур аптоном райониға йөткәп келингән.

Хитай сина ториниң хәвәр қилишичә, хитай компартийәси мәркизи комитети җилин өлкилик парткомниң даимий әзаси, чаңчүн шәһәрлик партком секретари ваң җүнҗеңни уйғур аптоном районлуқ партком даимий комитетиниң әзалиқиға йөткәшни қарар қилған.

Униң, хитай һөкүмити тәхминән 800 миңдин 2 милйонғичә уйғурни йиғивелиш лагерлириға қамиши хәлқарада қаттиқ тәнқидкә учрап, буниңда мәсулийити бар хитай әмәлдарлирини вә уларға һәмкарлашқан хитай карханилирини җазалаш тәлипи күчийиватқан мәзгилдә бу районға йөткәп келиниши диққәт қозғимақта.

Кишилик һоқуқ тәшкилатлириниң илгири сүрүшичә, хитайниң бу лагерларда тутқунларни диний етиқади, мәдәнийити, өрп-адәтлири вә ана тилидин ваз кечишкә, уни тәнқидләшкә зорлаватқанлиқиға даир ишәнчлик мәлуматлар бар икән.

Бу йил 55 яшлиқ ваң җүнҗең әсли шәндуңлуқ хитай болуп, у илгири йүннән, хубей қатарлиқ өлкиләрдә вәзипә өтигән. У 2016‏-йилдин бери җилин өлкилик парткомниң даимий әзаси, чаңчүн шәһәрлик парткомниң секретари, хитай мәркизи комитетиниң кандидат әзаси қатарлиқ вәзипиләрни атқуруп кәлмәктә иди.

Көзәткүчиләрниң илгири сүрүшичә, ваңниң йөткәп келиниши хитайниң уйғур районидики сияситидә һәрқандақ бирәр өзгириш болидиғанлиқидин дерәк бериду, дәп қияс қилиш мүшкүл икән.

Чәтәлдики “бошүн” ториниң ашкарилишичә, ваң җүнҗең 2014‏-йили хубейдики шйәняң шәһәрлик парткомниң секретарилиқ вәзиписини атқуруватқан мәзгилдә әрздарларниң кимлик картини тартивелип уларға зәрбә бериш, назарәт қилиш, әрздарларниң әркинликини чәкләш билән әйибләнгән. Шуңа, 2014‏-йили 8‏-айда шйәняңлиқ 16 нәпәр әрздар бейҗиңға берип, ваң җүнҗеңни вәзиписидин елип ташлашни тәләп қилған икән.

Униң уйғур районида конкрет қандақ вәзипә атқуридиғанлиқи вә униң қорқунчлуқ кишилик һоқуқ кризиси йүз бәргән һазирқидәк назук мәзгилдә бу районға йөткәп келинишидики сәвәбләр мәлум әмәс.