Xitayning jilin ölkisidiki yuqiri derijilik bir emeldar Uyghur rayonigha yötkep kélindi

Muxbirimiz erkin
2019-02-11
Élxet
Pikir
Share
Print

Xitayning jilin ölkisidiki yuqiriqi derijilik bir emeldari yéqinda Uyghur aptonom rayonigha yötkep kélin'gen.

Xitay sina torining xewer qilishiche, xitay kompartiyesi merkizi komitéti jilin ölkilik partkomning da'imiy ezasi, changchün sheherlik partkom sékrétari wang jünjéngni Uyghur aptonom rayonluq partkom da'imiy komitétining ezaliqigha yötkeshni qarar qilghan.

Uning, xitay hökümiti texminen 800 mingdin 2 milyon'ghiche Uyghurni yighiwélish lagérlirigha qamishi xelq'arada qattiq tenqidke uchrap, buningda mes'uliyiti bar xitay emeldarlirini we ulargha hemkarlashqan xitay karxanilirini jazalash telipi küchiyiwatqan mezgilde bu rayon'gha yötkep kélinishi diqqet qozghimaqta.

Kishilik hoquq teshkilatlirining ilgiri sürüshiche, xitayning bu lagérlarda tutqunlarni diniy étiqadi, medeniyiti, örp-adetliri we ana tilidin waz kéchishke, uni tenqidleshke zorlawatqanliqigha da'ir ishenchlik melumatlar bar iken.

Bu yil 55 yashliq wang jünjéng esli shendungluq xitay bolup, u ilgiri yünnen, xubéy qatarliq ölkilerde wezipe ötigen. U 2016‏-yildin béri jilin ölkilik partkomning da'imiy ezasi, changchün sheherlik partkomning sékrétari, xitay merkizi komitétining kandidat ezasi qatarliq wezipilerni atqurup kelmekte idi.

Közetküchilerning ilgiri sürüshiche, wangning yötkep kélinishi xitayning Uyghur rayonidiki siyasitide herqandaq birer özgirish bolidighanliqidin dérek béridu, dep qiyas qilish müshkül iken.

Chet'eldiki "Boshün" torining ashkarilishiche, wang jünjéng 2014‏-yili xubéydiki shyenyang sheherlik partkomning sékrétariliq wezipisini atquruwatqan mezgilde erzdarlarning kimlik kartini tartiwélip ulargha zerbe bérish, nazaret qilish, erzdarlarning erkinlikini cheklesh bilen eyiblen'gen. Shunga, 2014‏-yili 8‏-ayda shyenyangliq 16 neper erzdar béyjinggha bérip, wang jünjéngni wezipisidin élip tashlashni telep qilghan iken.

Uning Uyghur rayonida konkrét qandaq wezipe atquridighanliqi we uning qorqunchluq kishilik hoquq krizisi yüz bergen hazirqidek nazuk mezgilde bu rayon'gha yötkep kélinishidiki sewebler melum emes.

Toluq bet