Yuqiri derijilik xitay emeldarliri "Merkezning shinjangni idare qilish istratégiyesi" ning emeliylishish ehwalini tekshürgen

Muxbirimiz erkin
2019-07-15
Élxet
Pikir
Share
Print

Xitayning Uyghur aptonom rayonidiki yuqiri derijilik siyasiy, herbiy, memuriy emeldarliri Uyghur élining jenubiy we sherqidiki wilayet, sheherliride tekshürüsh élip bérip, xitay kompartiyesi merkizi komitétining "Shinjangni idare qilish istratégiyesi" ning emeliylishish ehwali heqqide tekshürüsh élip barghan.

Közetküchilerning ilgiri sürüshiche, nöwette xitay kompartiyesi "3‏-Nöwetlik shinjang xizmiti yighini" chaqirishqa teyyarliq qiliwatqan bolup, bu tekshürüsh bu yil yazda chaqirilidighan mezkur yighin bilen munasiwetlik iken. Yéqinda xongkongdiki "Jenubiy xitay seher pochtisi" gézitining xitayning "3‏-Nöwetlik shinjang xizmiti yighini" chaqirishqa teyyarliq qiliwatqanliqi, yighinda xitayning bu rayondiki siyasitining közligen meqsetke yetken-yetmigenliki körüp chiqilishi mumkinlikini ilgiri sürgen.

Xitay hökümiti 2017‏-yildin bashlap 800 mingdin 2 milyon'ghiche Uyghurni we bashqa türkiy milletlerni tutqun qilip, lagérlargha qamighan. A'ililerni parchilap, Uyghurlarning diniy étiqadi, medeniyiti we tilini chekligen. Bu Uyghur ijtima'iy hayatigha éghir buzghunchiliq élip kelgenidi.

"Shinjang géziti" ning 15‏-iyul bergen xewiride bayan qilinishiche, shinjang herbiy rayonining siyasiy komissari li wéy aqsu, qizil su qeshqer qatarliq jaylardiki herbiy qisimlar we chégra mudapi'e ponkitlirida tekshürüsh élip barghan. Uyghur aptonom rayonining mu'awin re'isi erkin tuniyaz ürümchi, turpan, qumul qatarliq jaylarda, ürümchi shehirining partkom sékrétari shü xeyrong ürümchi shehirige qarashliq saybagh rayoni qatarliq jaylardiki ijtima'iy rayon, saqchi ponkiti, edliye orni, sehiye mulazim et merkizi qatarliq orunlarda nishanliq tekshürüsh élip bérip, xitay partiyesining "Shinjangni idare qilish bash istratégiyesi" ning emeliylishish ehwali, uning téximu chongqur emeliyleshtürülüshide saqliniwatqan mesililerni tekshürgen. Eger xitayning "3‏-Nöwetlik shinjang xizmet yighini" dégendek bu yil yazda chaqirilsa, Uyghur mesilisi dunyadiki eng chong kishilik hoquq krizisqa aylinip, gherb ellirining qattiq tenqidige uchrawatqan bir mezgilde ötküzgen bolidiken.

Toluq bet