“Xitay heqqidiki xelq'ara parlaméntlar birleshmisi” Uyghurlarni depsende qilghan xitay emeldarlirini jazalashni telep qildi
2022.10.17
“Xitay heqqidiki xelq'ara parlaméntlar birleshmisi” (IPAC) 14-öktebir bayanat élan qilip, xitay kompartiyesining 16-öktebir béyjingda bashlan'ghan 20-qurultiyida shi jinpingning qayta hoquq tutushigha qarita inkas bildürgen. Dunyadiki 30 nechche döletning parlamént ezaliridin teshkil tapqan bu xelq'araliq teshkilatning bayanatida tekitlinishiche, “Shi jinpingning 3-qétim wezipe ötesh mudditini uzartishi xitay kompartiyesining dölet ichi-sirtidiki tehditkar siyasitini özgertish niyiti yoqlighining roshen signali” iken. Bayanatta mundaq déyilgen: “Bundaq achquchluq peytte, xitay heqqidiki xelq'ara parlaméntlar birleshmisi xitay xelqi, Uyghurlar, tibetler, xongkongluqlar we xitay kompartiyesining zulumigha uchrighan hem öz rehbirini tallashta söz heqqi bolmighan bashqa barliq kishiler bilen bille turidu”.
Bayanatta yene xitay kompartiyesining shi jinpingning rehberlikide Uyghurlar rayonida kishilik hoquqni keng kölemlik depsende qilghanliqi, xongkongning öz özini bashqurushida xelq'ara qanunlargha xilapliq qilghanliqi, rusiyening ukra'inagha qoralliq tajawuz qilishini yoshurun qollighanliqi, teywen'ge tehdit sélishni kücheytkenliki bildürülüp: “Xitay kompartiyesi shi jinpingning 3-qétim hoquq tutushigha kapaletlik qilish arqiliq shi jinpingning basturush siyasitini muddetsiz dawamlashturushigha ijazet berdi” dep körsitilgen.
Bayanatqa amérika, en'gliye, kanada, firansiye, awstraliye, daniye, shiwétsiye, irélandiye, norwégiye qatarliq 20 nechche dölettiki 49 neper parlamént ezasi imza qoyghan.
Ular bayanatida, démokratik döletlerning hökümetliridin Uyghur rayoni, xongkong, tibet we xitayning bashqa jaylirida kishilik hoquqni depsende qilishqa qatnashqan xitay emeldarlirini jazalashni telep qilghan.
Bayanatta, yuqirqidin bashqa yene teminlesh zenjiride xitaygha tayinishni nazaret qilish, teminlesh zenjirini köp xillashturush, teywen bilen bolghan iqtisadiy hemkarliqni kücheytish, chet'elde yashawatqan xitayning chégra halqighan tehditi astidiki guruppilarni qoghdashmu telep qilin'ghan.