Amérika xitay xelq qurultiyining erkin imirbaqini öz ichige alghan 14 emeldarigha émbargo qoydi

2020-12-07
Share

Amérika tashqi ishlar ministiri mayk pompépo 7-dékabir bayanat élan qilip, xitay xelq qurultiyi da'imiy komitétining erkin imirbaqini öz ichige alghan 14 neper mu'awin mudirigha émbargo qoyghanliqini élan qildi. Mayk pompéyoning tekitlishiche, yuqiriqi 14 kishige xitay xelq qurultiyining da'imiy komitéti xongkong xelqining en'gliye-xitay qoshma axbarati we xongkong tüp qanunigha asasen öz wekillirini saylishigha buzghunchiliq qilghanliqi üchün émbargo yürgüzülgen. Bu, amérika hökümitining tunji qétim xitay yuqiri hakimiyet qatlimidiki bir Uyghurgha xitay emeldarlirining qatarida émbargo yürgüzüshidur.

Erkin imirbaqi ilgiri Uyghur aptonom rayonining mu'awin re'isi, aptonom rayonluq xelq qurultiyining mudiri qatarliq wezipilerni ötigen bolup, hazir u xitay xelq qurultiyi da'imiy komitétining mu'awin mudiriliqini atqurup kéliwatqanidi. Mayk pompéyo bayanatida "Bügün tashqi ishlar ministirliqining bu nomussiz qilmishlarda mes'uliyiti barlarni jawabkarliqqa tartqanliqi", xongkong dölet bixeterlik qanunining tüzülüshi, maqullinishi we ijra qilinishigha chétishliq 14 kishining ismi békitilgenlikini tekitligen.

Xitay xelq qurultiyi da'imiy komitétining bu 14 neper mu'awin mudiri jang chünshyen, wang chén, saw jyenming, shen yüyyö, ji bingshyen, erkin imirbaqi, wang énshyang, wang dongming, chén du qatarliqlarni öz ichige alghan. Bayanatta, bu kishilerge wiza émbargosi qoyulup, ular we ularning a'ile-tawabi'atlirining amérikagha kirishi cheklinidighanliqi, ularning amérikadiki mal-mülki tonglitilip, amérikaliqlarning ular bilen alaqide bolushi men'i qilinidighanliqi bildürülgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet