Xoten wilayetlik memuriy mehkimining mu'awin waliysi tutup turup tekshürülmektiken

Muxbirimiz qutlan
2016-12-26
Share

Uyghur aptonom rayonluq intizam tekshürüsh komitétining tor bétidin melum bolushiche, xoten wilayetlik memuriy mehkimining mu'awin waliysi, qoshumche guma nahiyelik partkomning sékrétari shén yi yéqinda "Intizamgha éghir derijide xilapliq qilish" jinayiti bilen tutup turup tekshürülmektiken.

Bu Uyghurlar merkezlik olturaqlashqan xoten wilayitide "Parixorluq" we "Chiriklik" bilen tutulghan yene bir yuqiri derijilik xitay emeldari iken.

Xitay taratquliri bu yil 4-ayda xoten sheherlik partkomning sékrétari chén ywenxu'aning "Intizamgha éghir derijide xilapliq qilish" jinayiti bilen tutup turulup tekshürülüwatqanliqini xewer qilghan idi.

Muhajirettiki siyasiy analizchilar, Uyghur diyarida mutleq köp qisim xitay emeldarlirining "Parixorluq" we "Chiriklik" bilen jazaliniwatqanliqini, emma mutleq köp yerlik Uyghur emeldarlarning bolsa "Siyasiy meydani mustehkem bolmasliq" yaki "Mes'uliyitini ada qilmasliq" bilen jazalan'ghanliqini ilgiri sürmekte.

Yéqinqi yillardin buyan xitay hökümiti özi tüzgen atalmish "Aptonomiye qanuni" gha özi xilapliq qilip, nahiye, wilayet derijilik hakimiyet organliridiki Uyghur kadirlarning nisbitini zor derijide azaytqan we xitaylashturghan.
Igilinishiche, xoten wilayitide Uyghurlarning nopusi wilayet omumiy nopusining 95% tin köprek qismini igilisimu, emma xoten wilayetlik memuriy mehkimining nöwettiki 1 neper bash waliysi bilen 11 neper mu'awin waliysi ichide peqet 4 nepirila Uyghur bolup, qalghan 8 nepiri xitaylardin iken.

Xitay emeldarliridiki omumyüzlük "Parixorluq" we "Chiriklik" hadisisi bilen rayondiki her derijilik hakimiyet organlirining xitaylashturulushi közetküchilerning diqqitini qozghimaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet