Amérikaning mu'awin pirézidént namzati xitayni “Eng chong tehdit” dégen

Amérikaning kéler nöwetlik pirézidént namzati donald tramp mu'awin pirézidéntliqqa tallighan jamés dawid wans (J. D Vance)  Yéqinda muxbirlargha bergen jawabida, xitayni amérika üchün eng chong tehdit dégen. Bu kelgüside qurulush éhtimali bolghan donald tramp hökümitining xitaygha qattiq siyaset qollinidighanliqidin bésharet bergen.

“Blombérg xewerliri” torining bu heqte bergen xewirige qarighanda, jamés dawid wans “Foks xewerliri” muxbirining so'algha bergen jawabida, donald trampning kelgüside söhbet yoli bilen ukra'ina urushini ayaghlashturidighanliqini éytqan, arqidinla “ Mushundaq qilghanda  amérika özining diqqitini heqiqiy mesilige qaritalaydu, u bolsimu xitay mesilisidur. Xitay bizning dölitimiz üchün eng chong tehdittur, xitay hazir bizning diqqitimizni bashqa yaqqa burawatidu” dégen.

Jamés dawid wans  donald trampning xitaydin omumyüzlük chégra béji élish teklipini qollaydighanliqini bildürüp:“ Biz xitaydiki qul emgikini jazalaymiz, chünki xitay ashu nersilirini (mejburiy emgek mallirini) bizge kirgüzüwatidu” dégen.  Uning bildürüshiche, ular xitaygha sodida étibar bérishni toxtitish we xitay malliridin téximu yuqiri baj élish üchün bir qanun layihesi tüzüshni otturigha qoyghan bolup, uningda xitay mélidin élinidighan baj 60 pirsentke yétishi mumkin iken. Iqtisadshunaslarning bildürüshiche, bu qanun dunya sodisini astin-üstün qiliwétidiken؛ xitayning omumiy ishlepchiqirish qimmiti (GDP) ni 2.5 Pirsent, yilliq iqtisadiy éshish nisbitini 50 pirsenttin köp töwenlitidiken.

Xewerlerdin melum bolushiche, pirézidént namzati donald tramp 13-iyul küni qestke uchrap aman qalghandin kéyin uni qollash nisbiti ashqan؛ u tallighan mu'awin pirézidént namzati jamés dawid wansmu xelq arisidin yétiship chiqqan siyasetchi bolup, xitaygha qaritilghan siyasette donald tramp bilen oxshash meydanda iken. Melumatlargha qarighanda, u ilgiri esker bolghan, tijarette utuq qazan'ghan, adwokatliq qilghan, kitab yézip dang qazan'ghan shexs bolup, 2023-yil amérika dölet mejlisi kéngesh palatasining ezasi bolup saylan'ghan؛ 2024-yil mu'awin pirézidéntliq namzati bolghan.