Xitay en'gliye sayahet shirketlirini Uyghur élide “Yasalma” sayahet türlirige uyushturmaqta

Xitay da'iriliri Uyghur élige téximu köp terep sayahetchilirini jelp qilish üchün en'gliye sayahet shirketlirining xadimlirini, en'gliye parlaménti teripidin “Irqiy qirghinchiliq” rayoni, dep élan qilin'ghan Uyghur élide “Yasalma” sayahet türlirige uyushturmaqtiken. En'gliye “Waqit” gézitining xewer qilishiche, bu xil “Yasalma” sayahet türlirining chiqimini xitay teminlewatqan bolup, xitay bu sayahet xadilirining téximu köp gherbliklerni Uyghur élide sayahette bolushqa righbetlendürüshini ümid qilmaqtiken. 2023-Yili “Uyghur kishilik hoquq qurulushi” mexsus doklat élan qilip, Uyghur iligha bir qisim sayahet türlirini teshkillewatqan bir qanche gherb sayahet shirkitini xitayning Uyghur élidiki “Irqiy qirghinchiliq sayahet türliri” ge ishtirak qilishni toxtitishini telep qilghan. Netijide, bir qisim shirketler Uyghur élige qaratqan sayahet türlirini teshkilleshni toxtatqanidi.

Lékin en'gliye “Waqit” gézitining 5-yanwar bergen xewiride ashkarilinishiche, xitay teshkilligen bu sayahet türlirige, en'gliye sayahet shirketlirining xadimlirimu qatnashqan. Xewerde, “Sotsiyalistik xitayning dostliri” namliq bir xitayperes teshkilatning bu qétimliq sayahet heqqide mexsus “Shinjangni doklat qilish: shinjangdiki yéngiliq we köp xilliq” dégen témida neq meydan hem tor söhbiti ötküzgenliki, söhbette bir sayahet shirkiti xadimining “Shinjangdiki köp xilliq we güllinish” ni maxtap hali qalmighanliqi bildürülgen. “Waqit” gézitining qeyt qilishiche, 80 kishilik shu qétimliq sayahet türige en'gliyedin 8 neper, yawropa döletliridin 7 neper sayahet shirkiti xadimi qatnashqan iken.

Xewerde, mutexessisler xitayning rayon'gha munasiwetlik “Selbiy uchurlar we irqiy qirghinchiliq toghrisidiki bayanlarni amérika oydurup chiqarghan, dégen qarashqa nahayiti köp meblegh salghan” dep körsetkenliki, “Uyghur kishilik hoquq qurulushi” ning, sayahetchilik “Uyghurlarni nazaret qilish we éksplatatsiye qilishning achquchluq taktikisi” bolup qalghanliqini körsetkenliki tekitlen'gen.