Xitay da'iriliri bortalada olturushluq bir xitay erzdarning kimlik kinishkisini tartiwalghan

Xitay da'iriliri Uyghur ilining bortala oblastida olturushluq bir xitay erzdar we pa'aliyetchining kimlik kinishkisini tartiwélip, uning erz qilish üchün yurt atlap chiqishini tosqan. Uning chet'eldiki xitay kishilik hoquq torlirigha bildürüshiche, 25‏-yanwar küni kent partiye sékrétari we alaqidar kadirlar uning öyige basturup kirip, kimlik kinishkisini tartiwalghan.

Jyang jilin 26‏-yanwar chet'eldiki kishilik hoquq torlirigha téléfon qilip bergen uchurida, “Bu kadirlar chaghan ötküzüwatqanliqigha qarimay alayiten kélip, kimlik kinishkamni bulap chiqip ketti. Ularning meqsiti méning sirtqa chiqishimni tosush we erkinlikimni kontrol qilish” dégen.

Bortala shehirige qarashliq dalért baziri qaramodun kentining partiye sékrétari wang fachi uning kimlikini chaghan bayrimidin kéyin qayturup bérilidighanliqini bildürgen. Jyang jilinning bildürüshiche, qaramodun kenti partiye 2‏-sékrétarining uning öyide turup, mezkur xitay erzdarni közitip kéliwatqinigha xéli uzun waqit bolghan. Xitay kishilik hoquq tor betlirining qeyt qilishiche, erzdar jyang jilin uzundin buyan wijdan öktichilirini qollap kéliwatqan bir pa'aliyetchi iken.