Xitay bash ministiri xitay meblegh salghan gwadar ayrodurumning échilish murasimigha qatnashti

Birleshme agéntliqning 10-ayning 14-künidiki xewirige asaslan'ghanda, xitay bash ministiri li chyang pakistan sepirining béshida xitay meblegh salghan ayrodurumning échilish murasimigha tor arqiliq qatnashqan. Bu ayrodurum xitay teripidin xeterlik dep qaralghan baluchistan rayonigha jaylashqan bolup, bu rayonidiki xitay esliheliri izchil “Baluchistan azadliq armiyesi” ning qoralliq hujum nishani bolup kelgen idi.

Xewerde éytilishiche, xitay bash ministiri li chyang shexsen baluchistan'gha barmighan. Eksiche, baluchistandin 2000 kilométir yiraqliqtiki paytext islam'abadta gwadar (Gwadar) ayrodurumining échilish murasimigha tor arqiliq mewhum shekilde qatnashqan. Baluchistan rayoni qeshqerdin gwadar portigha tutishidighan “Xitay-pakistan iqtisadi karidori” ning déngizgha chiqish éghizigha jaylashqan bolup, ayrodurum gwadar portining yénigha qurulghan. Mezkur ayrodurum pakistandiki eng chong ayrodurumlarning biri bolup, Uyghur élini pakistan déngiz qirghiqigha tutashturidighan 75 milyard dollarliq “Xitay-pakistan iqtisadiy karidori” ning ul téshi, dep qarilidu. Pakistan bash ministiri shahbaz sherif murasimda “Xitaydiki qérindashlirimizning bu sowghisi ‛xitay-pakistan iqtisadi karidori‚ ning yene bir gültajisi bolghusi” dégen. Shuningdek li chyanggha özlirining pütün küchi bilen tiriship xitay ishchilirining bixeterlikige képillik qilidighanliqini bildürgen.

Melum bolushiche, xitay izchil türde pakistanning eng ishenchlik ittipaqdashlirining biri bolup, da'im “Qiyinchiliqqa duch kelgen qoshnisini qutquzushqa iqtisadiy yardem” bérip kelgenliki melum. 10-Ayning béshida, karachidiki inzhénérlar etriti ejellik hujumgha uchrap, ikki xitay ishchi ölgen idi. Baluchistan qoralliq küchliri özlirining bu hujumgha jawabkar ikenlikini élan qilghan hemde “Baluchistanning bayliqi chet'elge sétilmaqta, baluchistan xelqi buningdin qilchilikmu menpe'et qazan'ghini yoq” dep pakistan hökümitini eyibligen idi.