Xitay torda herbiy uchurlarni hembehirleshke bolghan kontrolluqni kücheytken

Xitay da'iriliri yéngi belgilime chiqirip, torda xitay armiyesige da'ir uchurlarni tarqitish we hembehirleshke bolghan kontrolluqni kücheytken.

Melum bolushiche, ötken heptining axiri élan qilin'ghan bu yéngi belgilime 3-ayning 1-künidin bashlap resmiy ijra qilinidiken. Xitay herbiy zamaniwilashturushni tézlitip, amérika armiyesige taqabil turalaydighan bir qoralliq küch qurup chiqishqa qattiq tirishiwatqan bir peytte, uning herbiy uchurlargha bolghan kontrolluqni téximu kücheytishi diqqet qozghimaqta. Amérika kabilliq xewerler tori-CNN ning bildürüshiche, xitay da'irilirining bu yéngi belgilimisi dunyadiki kölimi eng chong bolghan xitay armiyesining herikitini nazaret qilishtiki achquchluq uchur menbelirige érishishke tosqunluq qi'idighan bir heriket iken. Oxshash bir waqitta yene, xitayning bu belgilimisi xelq'araliq gé'o-siyasi tirkishish kücheytgen bir peytte, shi jinpingning xitay dölet xewpsizlikini kücheytish, dölet mexpiyetlikini qoghdash yolidiki axiriqi urunushlirining bir parchisi, dep qaralmaqta.

CNN Éytishiche, bu belgilime xitay herbiy tor blogi we analizchilirining xitay armiyesining qoral sistémisi, wezipige teyinlesh we herbiy qisimlirining herikitige da'ir widéyo yaki uchurlarni torda hambehirlishige qattiq tesir qilidiken. Xitay da'irilirining chüshendürüshiche, bu yéngi belgilime “Xata herbiy uchurlarni tarqitish”, “Herbiy mexpiyetlikni ashkarlash” ni öz ichige alghan mesililerni bir terep qilishni meqset qilmaqta iken. Belgilime qoral-yaraq sistémilirining tereqqiyati, sinaq qilinishidin tartip, herbiy maniwér we qoralliq qisimlarning yötkilishi, shuningdek herbiy qisimlarning teshkili qurulmisi, wezipisi hem urush qilish iqtidarighiche bolghan, ilgiri resmiy ashkarilanmighan barliq sahelerni öz ichige alghan.

CNN Ning xewiride, bu belgilime xitaydiki shexsiy herbiy tor yazghuchilirini we analizchilirini nishan qilghanliqi, ilgiri xitaydiki ochuq uchur menbelirining xitay armiyesining tereqqiyatigha a'it achquchluq yip uchi bilen teminlep kelgenliki bildürülgen. CNN Ning éytishiche, bezi mutexessisler bu belgilime béyjingning bashqa jaylardin teywen boghuzigha qoshun toplap keng kölemlik maniwér qilishi yaki herbiy yighilishining ashkarilinip kétishini tosushi üchün xizmet qilidu, dep körsetmekte iken.