Uyghur élidiki xitay qoralliq qisimlirining jeng meshiqi qilish we urushqa teyyarliq körüshni tekitlishi diqqet qozghidi

Xitayning Uyghur élide turushluq qoralliq qisimlirining jeng meshiqi qilishi we urushqa teyyarliq körüshni tekitlishi diqqet qozghimaqta.

Xitayning tengritagh torining xewiride éytilishiche, xitayning Uyghur élide turushluq qoralliq qisimliri xitay dölet re'isi shi jinpingning 14-nöwetlik memliketlik xelq qurultiyi 1-omumi'iy yighini mezgilide azadliq armiye we qoralliq saqchi qisim wekiller ömikining yighinigha qatnashqanda qilghan sözining rohini ögen'gende bes-beste Uyghur élidiki qoralliq qisimlarning urush qilish iqtidarini östürüsh heqqide ipade bildürgen.

Xewerde, “Jenubiy shinjang herbiy rayoni” melum polkining mu'awin komandiri aydin tursunbék sözide “Biz choqum urush meshiqi, islahat we yéngiliq yaritishta ching turushimiz, urushqa teyyarliq qilish xizmitige yéqindin diqqet qilishimiz we serxil eskerlerdin küchlük qoshun teshkillishimiz kérek” dégenliki, Uyghur élining gherbiy shimal chöl meshiq meydanida heqiqiy jeng qilish meshiqining jiddiy élip bériliwatqanliqi, düshmenning her xil tuyuqsiz xewpi aldida temkinlikni saqlash wezipisini yaxshi tamamlawatqanliqi qayta-qayta tekitlen'gen.

Xitayning Uyghur élidiki qoralliq qisimlirining urush qilish iqtidarini östürüwatqanliqi heqqidiki xewer bundin ilgirimu bir qanche qétim élan qilin'ghanidi. Xitay hökümiti 2017-yilidin buyan Uyghur élide milyondin artuq kishini lagérgha qamighandin sirt, rayonda yuqiri téxnikiliq nazaret sistémisi arqiliq mutleq kontrulluqni ishqa ashurup bolghan bir weziyette rayondiki qoralliq qi'ismlarning urush qilish iqtidarini tekitlishi diqqet qozghaydiken.