Xitay herbiy qomandanining ölüwélishi xitay armiyesidiki ziddiyetni ashkarilap bergen
2023.07.12
Firansiye xelq'ara radiyosi (RFI) 10-iyul küni bergen xewerge qarighanda, xitay azadliq armiyesi rakéta qismining mu'awin qomandani wu goxu'a özini öltürüwalghan. Xitay azadliq armiyesi uni “Méngisige qan chüshüp öldi” dep élan qilghan. Emeliyette bu weqe xitay armiyesi ichidiki ixtilap we yeng ichidiki küreshni ashkarilap bergen bolup, xitay déngiz armiyesining bir sabiq emeldarining éytishiche, xitay armiyesi rakéta qismining qomandani li yüchaw amérikada oquwatqan oghli sewebidin qolgha élin'ghan, chünki uning oghli amérikagha axbarat teminligenmish.
Xewerde éytilishiche, hazir xitay armiyesi rakéta qismining köpligen kattibashliri bu ishqa chétilip qalghan. Xitay azadliq armiyesi rakéta qismining orni nahayiti muhim bolup, teywen'ge hujum qilishtiki asasliq küch hésablinidiken. Bu yerdin chiqqan mesile shi jinpingning yéqinda herbiy emeldarlarni köplep almashturushi bilen munasiwetlik iken. Armiye ichide isyan chiqishidin ensirep yüridighan shi jinping 10 nechche yildin buyan 100 ge yéqin herbiy emeldarni jazalighan bolup, armiye ichidiki tazilash misli körülmigen derijige yetken. Rusiyede chiqqan herbiy topilang kommunist xitaydimu ensiresh peyda qilghan bolup, shi jinping herbiy emeldarlarni qattiq tizginlesh we intizamni chingitishqa téximu ehmiyet bermekte iken.