Yawropa ittipaqi xitayning herbiy ighwagerlikini keskin tenqidlidi

Yawropa ittipaqining ijra'iye orgini bolghan yawropa ittipaqi komitéti 31-iyulda filippin paytexti manilada chaqirilghan “Filippin soda munbiri” yighinida, xitay hökümitini eyiblep keskin söz qilghan. Komitét re'isi ursula fon dér léyén (Ursula von der Leyen) xanim yighinning échilish nutqini sözligende “Birleshken döletler teshkilati (b d t) xewpsizlik komitétining da'imiy ezasi bolghan xitay öz mes'uliyiti we mejburiyitini ada qilish ornigha hindi-tinch okyan boyidiki herbiy pa'aliyetlirini bekla kücheytiwatidu. Ukra'ina mesiliside xitay öz mejburiyitini ada qilmidi” dégen.

“Siyasiyon” gézitining 31-iyuldiki obzorida éytilishiche, u bu sözlerni éytqanda xitay hökümitining teywen boghuzi we jenubiy déngiz boyida herbiy heriketlerni jiddiyleshtürüshi öz nöwitide dunyawi aqiwet peyda qilidighanliqini eskertken. Shundaqla yawropa ittipaqining bu jaylardiki ishlargha arilishishni bashlap bolghanliqini tilgha alghan. U bu heqte toxtilip: “Biz kim bilen qoshna bolushni talliyalmaymiz. Emma kim bilen, qandaq yosunda soda qilishni tallash imkaniyitige igimiz” dégen. Ursula xanimning bu sözliri nöwette yawropa ittipaqining meydanigha wekillik qilidu, dep qariliwatqanliqi melum.

Melum bolushiche, ursula xanim izchil xitay heqqide keskin meydanda bolup kelgenliktin, xitay hökümitining neziridiki “Nachar shexs” ke aylinip qalghan. Buningdin ilgiri u firansiye prézidénti émanyul makron (Emmanuel Macron) bilen béyjinggha ziyaretke barghandimu roshen halda perqliq bolghan mu'amilige uchrighan idi.