“Xitayning herbiy küchi” namliq eng yéngi doklat xitayning herbiy jehettiki hazirliqliri we duch kéliwatqan qiyinchiliqlirini ashkarilan'ghan

Washin'gtondin muxbirimiz shadiye teyyarlidi
2024.12.20

“Qiyadiki urush” (War on the Rocks) torida amérika dölet mudapi'e ministirliqi teyyarlighan “Xitayning herbiy küchi” namliq eng yéngi doklat élan qilin'ghan. Doklatta, xitayning herbiy sahede qolgha keltürgen ilgirileshliri we duch kéliwatqan qiyinchiliqliri mulahize qilin'ghan.

Mezkur doklatta, xitayning ikkinchi dunya urushidin buyan herbiy küch-quwwet jehette qolgha keltürgen ilgirileshliri, jümlidin yadro qorallar, rakéta we emeliy urush jehettiki ilgirileshliri analiz qilin'ghan. Shuning bilen bir waqitta yene, xitayning herbiy jehettiki téxnikiliq ajizliqliri we emeliy urush tejribisidiki yochuqliri körsitip ötülgen. Doklatta yene xitayning yadro bombilirining sani hazirqi 600 din téz sür'ette köpiyip, 2030-yilgha barghanda 1000 din éship kétidighanliqi mölcherlen'gen.

Doklatta xitayning 2035-yilidin 2049-yilighiche herbiy jehette yer sharigha hökümranliq qilish ornini qolgha keltürüsh üchün, chiriklik we teshkiliy qurulma jehettiki ajizliq hem ichki xirislargha qarimay, herbiy jehettiki ilgirileshni dawam qilishqa tirishidighanliqi, shi jinping hakimiyettiki mezgilide teywen mesilisini hel qilish niyitidin waz kechmeydighanliqi tekitlen'gen.

Bu heqtiki eng yéngi doklatta éytilishiche, xitayning dölet mudapi'e xamchoti 330 milyard dollardin 450 milyard dollarghiche bolup, aktip herbiy wezipe ötewatqan eskiri 2 milyondin ashidiken. Uningdin bashqa xitayning déngiz armiyesi we hawa armiyesining muhim küchliri dawamliq éshish halitide iken.

Doklatta déyilishiche, xitayning yéqinqi bir nechche yilda yadro qorallirini amérika istixbarat da'iriliri perez qilghan sür'ettinmu téz qedemde ghayet zor küch bilen kéngeytiwatqanliqi, amérika üchün yéngi endishilerni peyda qilghan. Bu weziyet amérika armiyesining uzun yillardin béri yadro qorallirini rusiyeni nishan qilip orunlashturushtek herbiy isxémisini pütünley buzup tashlighan. Derweqe, bu seweblik amérika pirézidénti jow baydén 2024-yilining mart éyida amérika armiyesige yadro qorallirining istratégiyelik orunlashturush nishanini xitayni merkez qilghan halda tengsheshke buyruq bergen idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.