Xitay hökümiti 22 döletning birleshme tenqidige qarita özini aqlidi

Muxbirimiz eziz
2019-07-11
Élxet
Pikir
Share
Print

Birleshken döletler teshkilatining mexsus yighinida 22 dölet birleshme mektupqa imza qoyup, xitay hökümitini Uyghurlar diyaridiki qanunsiz tutqunni toxtitish we yighiwélish lagérlirini taqashqa chaqirghanidi. 10-Iyul küni xitay tashqi ishlar ministirliqining bayanatchisi géng shu'ang bu heqte söz qilip: "Biz ashu döletlerni pakitqa hörmet qilishqa, bir tereplime we epqachti paranglargha qulaq salmasliqqa dewet qilimiz. Shundaqla shinjang mesilisige alaqidar ichki ishlirimizgha arilashmasliqqa chaqirimiz" dégen.

Xitay hökümiti bashqurushidiki "Xitay kündilik xewerler" gézitimu 10-iyul küni derhalla "Shinjang edebiyat-sen'etchiler birleshmisi" ning sabiq partiye sékrétari we pexriy mudiri bolghan lyu bing arqiliq amérika qatarliq gherb döletlirining Uyghurlar mesilisi heqqide xitaygha qaratqan tenqidlirige inkas qayturup xitay hökümitini aqlidi.

Lyu bing maqaliside: "Amérika shinjangdin nechche ming kilométir yiraqta. Emma ular özlirimu kélip baqmighan bir jay heqqidiki yalghan-yawidaqlargha shunche asan ishinip ketmekte" déyish arqiliq xelq'ara axbaratlarning Uyghurlar diyari heqqidiki tepsiliy we birinchi qol melumatlirini inkar qilishqa urun'ghan. Shundaqla 2004-yili neshr qilin'ghan "Shinjang: xitayning musulmanlar chégrasi" namliq eserning aptorlirini "Gerche shinjanggha kélip baqqan bolsimu tarixiy pakitlarni we ré'alliqni burmilap bayan qilghan" dep eyibligen.

Maqalida lyu bing yene amérika hökümitini "Mushu xildiki düshmenlik heriketlirining bashlamchisi" dep qarighan hemde "Amérika hökümiti 'bir belwagh bir yol qurulushi'ni körelmey, Uyghurlar mesilisi arqiliq etraptiki döletlerni bu qurulushqa qatnashmasliqqa ündewatidu" dep eyibligen.

Halbuki yéqinqi mezgillerde arqimu-arqidin Uyghurlar diyarigha bérip kelgen herqaysi axbarat wasitilirining muxbirliri xitay hökümitining qatmu-qat tosqunluqlirigha qarimay toplap kelgen melumatlar, shundaqla radiyomiz muxbirliri igiligen birinchi qol uchurlar xitay hökümitining Uyghurlargha medeniyet we étnik jehetlerde omumyüzlük tazilash siyasiti yürgüzüwatqanliqini yéterlik derijide körsitip turmaqta.

Toluq bet