Xitay hökümiti Uyghur rayonida choshqa baqmichiliqi igilikini dawamliq kéngeytmekte

Xitay hökümiti musulmanlar köp sanliqni igileydighan Uyghur diyarida choshqa baqmichiliqi igilikini dawamliq kéngeymekte.

Melum bolushiche, nöwette da'iriler Uyghur diyarining shixu rayonida chong kölemlik yene bir choshqa baqmichiliq férmisi qurmaqta iken. Uyghur aptonom rayonluq hökümet ötken yili mezkur musulmanlar rayonini xitaydiki eng choshqa baqmichiliq bazisigha aylandurup, xitayning ichki ölkilirini choshqa göshi bilen teminleydighanliqini élan qilghan. Buning bilen qeshqer, bay, cherchen qatarliq nahiye-sheherliride chong kölemlik choshqa baqmichiliq férmiliri qurulghan.

Lékin mezkur pilan chet'eldiki Uyghurlarning qattiq tenqidige uchrighan. Ular mezkur pilan xitayning Uyghurlargha qarita élip bériwatqan “Medeniyet qirghinchliqi” ning bir parchisi, uning meqsiti “Uyghurlardiki islamiy étiqadni suslashturup, assimilatsiyeni tézlitish” dep eyibligen. Xitaydiki “Junggo xewerliri” torining bildürüshiche, nöwette shixoda quruluwatqan chong kölemlik choshqa baqmichiliq férmisi shixoning shimalidiki bingtu'en 7-dewiziyege qarashliq xuyangxé shehiride qurulmaqta iken.

Xewerde mezkur férmining bu yil 10-ayda resmiy ishqa kirishidighanliqi, deslepki qedemde az kem 10 ming tuyaq choshqa béqilidighanliqi, 2021-yili 30 ming tuyaqqa yetküzülidighanliqini bildürgen. Xitay da'irilirining Uyghur diyarini choshqa baqmichiliq bazisigha aylandurush pilani uning Uyghurlarni choshqa göshi yéyiske zorlap, choshqa göshi istémal qilish-qilmasliqni ularning kompartiyige we xitay hökümitige sadiq yaki emeslikini sinashtidiki ölchem qiliwalghan bir waqitta otturigha qoyulghan idi.