Хитай һөкүмити уйғур елиға қошна дөләтләр билән терролуққа қарши һәмкарлиқни күчәйтмәкчи

Мухбиримиз ирадә
2016-08-04
Share


Хитай һөкүмити пакистан, афғанистан вә таҗикистанлар билән террорлуққа қарши туруш иттипақдашлиқи қурған. Ройтерсниң бу һәқтики хәвиридин қариғанда, хитай армийәсиниң баш штаб башлиқи фаң феңхуй чаршәнбә күни үрүмчи шәһиридә юқиридики дөләтләрниң армийә баш шитаб башлиқлирини күтүвалған вә улардин террорлуққа ортақ қарши турушни тәләп қилған.

Хитайниң шинхуа тори бу һәқтә тарқатқан хәвиридә, һәрқайси тәрәпләрниң терроррлуқ вә радикаллиқни район бихәтәрликигә әң зор тәһдит, дәп тонуп, "төт дөләт миханизими" арқилиқ бу күчләргә қарши күрәш қилип, әза дөләтләрниң муқимлиқиға капаләтлик қилидиғанлиқини тәкитлиди, дегән.

Хитай һөкүмити уйғурларға четишлиқ һәрқандақ бир вәқәни терролуқ дәп елан қилиш билән биргә, хәлқарада хитайниң "шәрқий түркистан ислам һәрикити" дәйдиған терролуқ тәшкилати билән күрәш қиливатқанлиқини илгири сүрүп кәлгән. Шуңа, хитай һөкүмитиниң бу учришиш арқилиқ уйғур елигә хошна болған юқиридики дөләтләрниң ярдимини қолға кәлтүрмәкчи болғанлиқи мөлчәрләнмәктә.

Алдинқи күни елан қилинған хәвәрләрдә, пакистан армийиси генерали шерифниң хитай генерали фаңға әлқаидә тәшкилатиға четилған шәрқий түркистан ислам һәрикитини қаттиқ бастуридиғанлиқи һәққидә вәдә бәргәнлики хәвәр қилинған иди.

Ройтерс бу һәқтики хәвиридә, үрүмчидә ечилған бу йиғин, дәл бу һәптиниң бешида хитай мудапиә министири чаң вәнчүән афғанистан армийиси генерали қәдәм шаһ шаһимгә өзлириниң шәрқий түркистан ислам һәрикитигә қарши күришини қоллап бәргәнликигә рәһмәт ейтқандин кейингә тоғра кәлди, дегән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт