Xitay hökümiti Uyghur élidiki paxta sana'itini téximu tereqqiy qildurushni qarar qilghan

“Xitay kündilik géziti” ning 10-ayning 15-kündiki xewirige asaslan'ghanda, xitay yéza igilik we yéza ishliri ministirliqi Uyghur aptonom rayonida paxta ishlepchiqirishni téximu kéngeytishning yéngi tedbirlirini otturigha qoyidighanliqini élan qilghan. Xitay yéza igilik ministiri xen jün toqumichiliq ishlepchiqirishidin bashlap teminlesh zenjirini qollaydighan bu yuqiri süpetlik paxta mehsulatini téximu ashuridighanliqigha wede bergen. U “Shinjangda, yuqiri süpetlik paxtining tereqqiyatini ilgiri sürüsh üchün dawamliq tirishimen” dégen.

Uyghur élide Uyghurlarni asas qilghan musulmanlarning keng kölemde qolgha élinip, mejburiy emgekke sélin'ghanliqi ispatlan'ghandin kéyin, amérika qatarliq gherb démokratik döletliri Uyghur élidin kelgen mehsulatlarni chekleshke bashlighanidi. Tetqiqatchilar Uyghur élide paxta ishlepchiqirishning Uyghur mejburiy emgiki bilen bulghan'ghanliqigha a'it köpligen pakitlarni otturigha qoyghanidi. Xitayda chiqidighan paxtining %90 tin köprekining Uyghur élide ishlepchiqirilidighanliqi melum.

Xitay taratqulirining ashkarilishiche, nöwette Uyghur élidiki xitay toqumichiliq kiyim-kéchek zawut-karxanilirining sani 3725 ke yétip barghan. Mezkur rayondiki xitay toqumichiliq kiyim-kéchek karxanilirining sani 2014-yilqidin 5.7 Hesse artqan. Buning ichide xitayning bashqa ölkiliridin Uyghur rayonigha kélip meblegh salghan xitay karxanilirining sani 1350 iken.

Tetqiqatchilar buning dölet hamiyliqidiki emgek küchlirini yötkesh pirogrammisigha baghlinishliq ikenlikini, Uyghur élidiki birqanche milyon Uyghur, qazaq, qirghiz we bashqa türkiy milletlerning bu zawut-karxanilarda mejburiy emgekke tutulghanliqini bildürmekte.