Президент доналд трамп: «таҗсиман вирус юқуми америкаға қилинған ‹пеарл харбор порти һуҗуми' динму еғирдур»

Мухбиримиз ирадә
2020-05-07
Елхәт
Пикир
Share
Принт

Америка президенти доналд трамп таҗсиман вирус юқумини иккинчи дуня урушида японийә армийәсиниң американиң «пеарл харбор порти» ға қилған һуҗумдинму еғир, деди.

Президент доналд трамп юқириқи сөзни 6-май чаршәнбә ақсарайдики мухбирларни күтүвелиш йиғинида қилған. У сөзидә бу қетимлиқ вирус юқуминиң америкаға 2-дуня уруши мәзгилидә японийәниң пеарл харбор портини бомбардиман қилишидин вә һәтта 20 йил илгири йүз бәргән «11-сентәбир вәқәси» динму қаттиқ зәрбә болғанлиқини билдүргән.

У мундақ дегән: «биз дөлитимизгә қилинған әң еғир һуҗумни баштин кәчүрүватимиз, бу биз дуч кәлгән әң еғир һуҗум. Бу ‹пеарл харбор порти һуҗуми' динму, дуня сода мәркизигә қилинған һуҗумдинму еғир.»

Президент доналд трамп чаршәнбә күнидики сөзидиму вирус юқуминиң америкаға вә пүтүн дуняға зор зиян йәткүзүшидә хитайниң мәсулийити барлиқини тәкитлигән. У: «бу вирус юқуми әслидә йүз бәрмәслики керәк иди. Әслидә уни чиққан йеридә, йәни хитайда тизгинливелиш мумкин иди, әмма ундақ болмиди,» дегән.

Шу күни йәнә америка ташқи ишлар министири майк помпейому хитайни вирус мәсилисидә әйиблигән вә улардин мустәқил тәкшүргүчиләрниң хитайға кирип тәкшүрүш елип беришиға йол қоюшни йәнә бир қетим тәкитлигән.

2019-Йили 12-айда хитайниң вухән шәһиридә пәйда болған таҗсиман вирус һазирғичә америкада 1 милйон 200 миң кишини юқумландурған, 73 миңдин артуқ кишиниң қаза қилишиға сәвәб болған. Нөвәттә америка-хитай мунасивитиниң өткән 40 йилдин буянқи әң төвән чәккә чүшкәнлики мәлум. Бир қисим анализчилар буни икки дөләт мунасивәтлириниң «йеңи соғуқ уруши» дәвригә киргәнликини илгири сүрмәктә.

Пикирләр (0)
Share
Толуқ бәт