Xitay - iran ayallar muhakime yighini ürümchide ötküzülgen

Igilinishiche, 3 - nöwetlik xitay - iran ayallar muhakime yighini 22 - séntebir küni ürümchide ötküzülgen.

“Shinjang géziti” ning bu heqtiki xewirige qarighanda, mezkur muhakime yighini xitay bilen iran ayallirining öz - ara hemkarliqi we dostane alaqisini kücheytish hemde ikki dölet ayallirining jem'iyettiki ornini yoqiri kötürüshni meqset qilip chaqirilghan iken.

Xewerde déyilishiche, muhakime yighinida Uyghur aptonom rayonluq ayallar birleshmisi partiguruppisining sékritari xu xenmin xitay ayalliri, jümlidin Uyghur rayonidiki ayallarning omumiy ehwalini tonushturghan. Iran islam jumhuriyiti ayallar we a'ile ishliri ministiri hijazi iran ayallirining ehwali heqqide doklat bergen. Mezkur muhakime yighinida yene ayallar we iqtisad, ayallar we ma'arip, ayallar hoquqi qatarliq témilarda muhakime élip bérilghanliqi melum.

Igilinishiche, xitay bilen iran otturisida yéqinqi yillardin buyan türlük saheler boyiche alaqiler kücheygen bolup, Uyghur aptonom rayoni ikki dölet arisidiki alaqilerde köwrük qilinmaqtiken.

Bu yil yaz iran paytexti téhranda “Shinjang medeniyet heptiliki” ötküzülgen bolup, shinjang naxsha - ussul ömiki iranda birqanche meyda oyun körsetken. Musteqil taratqularning xewirige qarighanda, xitay hökümitining Uyghur aptonom rayonidiki shi'e mezhipige mensup taliplarni iran'gha ewetip terbiyelewatqanliqi ilgiri sürülmekte.

Közetküchiler, bu qétimliq xitay - iran ayallar muhakime yighinining ürümchide ötküzülishi ikki dölet arisidiki Uyghur élini köwrük qilghan bir qatar sirliq munasiwetlerning bir körinishidur, dep hésablimaqta.