Xitayning iqtisadiy jehettiki jahan'girlikini cheklesh chuqanliri kötürülmekte

Beziler “Dunyaning erzan bahaliq emgek baziri” dep atawatqan xitayning iqtisadiy yéngi küch süpitide bash kötürüshi bilen köpligen kishiler “Xitayning iqtisadta güllinishi dunyaning tereqqiyatigha we xitayning özidiki siyasiy islahatqa seweb bolidu” dep qarap kelgen idi. Emma nöwettiki ehwal bu xil “Güllinish” ning mahiyette diktatorluqqa we hakimmutleqliq asasidiki kontrolluqqa desmi boluwatqanliqini namayan qilmaqta iken.

Amérikida chiqidighan “Dölet menpe'eti” gézitining 5-awghusttiki bash maqaliside körsitilishiche, shi jinping hakimiyetni qolgha alghandin buyan omumiy nazaret we siyasiy teshwiqat xitaydiki asasiy éqimgha aylan'ghan. Uyghurlar diyari ismi-jismigha layiq zulum makani bolup qalghan. Bu zulumlar hazir xitay tewesidin halqip alliqachan xongkong, teywen qatarliq jaylarghiche kéngeymekte iken. Nöwette bolsa shi jinping teywenning musteqilliqini étirap qilghan herqandaq shirketni “Edebleydighanliqi” heqqide jar salmaqta iken.

Maqalida körsitilishiche, hazir xitay hökümiti iqtisadiy mu'amilini destek qilip turup, gherb dunyasidiki shirketlerni “Teywen arili xitayning bir qismi” dégenni étirap qilishqa mejburlimaqta iken. Buning bilen yéqinda xitay hökümiti ellikke yéqin awi'atsiye shirkitini “Teywen-xitayning bir ölkisi” dégen chüshenchini étirap qilishqa mejburlighan hemde ularning tor bétidiki “Teywen” dégen namni özgertishni telep qilghan. Yéqinda bolsa bu telepler amérikidiki birnechche dangliq awi'atsiye shirketlirige yollan'ghan.

Maqale aptori mushu ehwallargha asasen hazir xitayning qiliwatqanlirining addiyghine “Teywen dawasi” emeslikini, eksiche buning arqigha nahayiti zor siyasiy nishan yoshurun'ghanliqini, shunga bu xil mutihemlikning dawam qilishigha dawamliq süküt qilghanda buning amérika üchün zor xeter bolidighanliqini tekitleydu.