Xitaygha ishpiyon bolghan FBI xizmetchisi kün shenchün sotlandi

Amérika fédératsiye tekshürüsh idarisi (FBI) ning uzun yilliq xizmetchisi kün shenchün (jo'éy chün) 1-awghust nyu-yorkta xitaygha ishpiyon bolup ishlesh jinayiti bilen sotqa tartilghan.

Melum bolushiche, kün shenchün 1969-xitayda tughulghan bolup, kéyin amérika puqraliqigha érishken we 1997 -yilidin buyan amérika fédératsiye tekshürüsh idariside 19 yil ishligen.

Birleshme agéntliqning xewiride déyilishiche, kün shenchün amérika fédératsiye tekshürüsh idarisining éléktrlik zapchaslar téxnik xadimi bolup, u özining FBI gha da'ir “Qet'iy mexpiy höjjetlerni körüsh salahiyiti” ge érishken we bir türküm resim we sezgür uchurlarni xitay jasusigha yetküzüp bergen, dep eyiblen'gen.

Melum bolushiche, u FBI ishligen mezgilde xitay dölet emeldarlirini öz ichige alghan bezi kishiler we shirketler bilen alaqe ornatqan we amérika fédératsiye tekshürüsh idarisige özining bu pa'aliyetliri heqqide xata uchur bergen.

Amérika edliye ministirliqining bu heqtiki matériyaligha qarighanda, u 2011-yili chet'elde sayahet qilish jeryanida bir xitay hökümet xadimi bilen uchrashqan we xitay xadimi bilen mexpiy uchurlar heqqide sözleshkendin bashqa, amérikining bir mexpiy xadimining ismini ashkarilighan.

Kün shenchün 2013-yili amérika fédératsiye tekshürüsh idarisining idare qurulmisi heqqidiki bir sxémini yuqiridiki xitay xadimigha yetküzüp bergen, 2015-yili mezkur xitay xadimgha yene FBI qollinidighan razwédka téxnikisi toluq chüshendürülgen matériyallarni yollighan.

Melum bolushiche, amérika fédératsiye tekshürüsh idarisi 2015-yilidin bashlapla kün shenchünning péyigha chüshken we bu yil 16-martta uni qolgha alghan. U özining barliq jinayetlirini iqrar qilghan.

U, bu yil 2-dékabir qayta sotlinidighan bolup, eger uning jinayiti emeliyleshse, 10 yildin artuq qamaq jazasigha höküm qilinishi mumkin iken.