Xitaygha jasusluq qilghan sabiq CIA xadimining sot hökmi élan qilindi

Xitay üchün jasusluq qilghan amérika merkiziy tekshürüsh idarisi (CIA)ning sabiq xadimi aléksandir yuk ching ma (Alexander Yuk Ching Ma), yeni ma yüching 11-séntebir küni 10 yilliq qamaq jazasigha höküm qilin'ghan.

Birleshme agéntliqining xewirige qarighanda, 71 yashliq ma yüching bu yil 5-ayda fédératsiye teptish mehkimisi bilen kélishken bolup, u “Amérikaning dölet mudapi'e uchurlirini toplash yaki chet el hökümitige yetküzüsh jinayitini qobul qilghan. Eger u fédératsiye teptish mehkimisi bilen kéliship jinayetlirini tapshurmighan bolsa, ömürlük qamaq jazasigha höküm qilinidiken.

Amérika edliye ministirliqining jakarlishiche, ma yüching amérika merkiziy axbarat idarisi (CIA) ning sabiq xizmetchisi bolup, u xongkongda tughulghan we kéyinche amérika puqraliqigha ötken iken. Ma yüching 1982-yildin 1989-yilghiche CIA da xizmet qilghan. CIA Ning sezgür we mexpiy uchurlirini körüsh salahiyiti bar bolghan ma yüching 1989-yili amérika merkiziy tekshürüsh idarisidin istipa bergendin kéyin bir mezgil xitayda yashighan.

U 2001-yili 3-ayda shangxey sheherlik xitay dölet xewpsizlik idarisi (SSSB) xadimlirining teklipi bilen özining shu waqitta amérika merkiziy axbarat idariside ishleydighan qérindishini xitay mexpiy xadimliri bilen körüshüshke maqul keltürgen. Netijide uning qérindishi xitay dölet xewpsizliki xadimliri bilen xongkongdiki bir méhmanxanida uchriship, amérikaning zor miqdardiki dölet mudapi'e uchurlirini sétiwetken. Buning bedilige ular xitaydin 50 ming dollar mukapat puli alghan. Ular yene xitayning mexpiy xadimi bilen dawamliq hemkarlishishqa qoshulghan.

Ma yüching 2001-yili hawaygha qaytip kelgen. U 2003-yili 3-ayda amérika fédératsiye tekshürüsh idarisi (FBI) ning honoluludiki shitabida toxtamliq terjiman bolup ishleshke iltimas qilghan. Eyni chaghda amérika fédératsiye tekshürüsh idarisi ma yüchingning xitay dölet xewpsizlik organliri bilen bolghan alaqisini bilip bolghan bolsimu, uni iz qoghlap tekshürüsh pilanining bir qismi süpitide ishqa qobul qilghan. Bu arqiliq uning pa'aliyitini we xitay bilen bolghan alaqisini iz qoghlap tekshürgen.

6 Yil boyiche ma yüching köp qétim xitaygha uchur we resim ewetken. U yene xitay dölet xewpsizlik organlirining xadimliri körsetken bir resimdiki 4 amérikaliqning kimlikini éniqlap bérish üchün qérindishini maqul keltürgen. Qérindishi u resimdiki ikki amérikaliqning kimlikini éniqlap bergen. Bu shexslerning salahiyiti amérikaning dölet mudapi'e uchuri bolup hésablinidiken.

Ma yüching 2020-yili qolgha élin'ghan bolsimu, uning qérindishi késellik sewebi bilen ölüp ketken.

Amérika fédératsiye tekshürüsh idarisi honolulu alahide wakaletchisi stéwén mérril ma yüchingning jazasi élan qilin'ghandin kéyin bergen bayanatida mundaq dégen: “Bu weqe bashqilarghimu sawaq bolsun. Meyli aridin qanchilik waqit ötken bolsun yaki qanchilik waqit kétishidin qet'iynezer, siz haman bir küni sotqa tartilisiz.”