Бир хитай пуқраси американиң һәрбий кемә мәхпийәтликини хитайға йәткүзүп бәрмәкчи болғанлиқ җинайити билән әйибләнгән

Мухбиримиз җәвлан
2020-11-03
Share

Америка бирләшмә агентлиқиниң 2-ноябир хәвәр қилишичә, бир хитай пуқраси америкадин һәрбий йәл кемә сетивелип хитайға әвәтмәкчи болғанлиқ җинайити билән әйибләнгән.

50 яшлиқ хитай пуқраси ге суңтав 2-ноябир күни америка федратсийә сотида җинайитини иқрар қилип, америкаға сахта експорт учури бәргәнликини, деңизда мәшғулат қилидиған һуҗумчи кемә вә униң маторини алдамчилиқ билән хитайға експорт қилмақчи болғанлиқини ейтқан.

Ге суңтавниң иқрарнамисида ейтилишичә, у шаңхәй вейфең пән-техника чәклик ширкитиниң директори болуп, әйни чағда униң америкадики хизмәтчиси яң яң америкадин бензин, дизел яки айропилан йеқилғуси ишлитидиған матор сәпләнгән һуҗумчи йәл кемисидин 7 кемини заказ қилмақчи болған. Бу кемиләр вә көп хил йеқилғулуқ маторлар америка һәрбий саһәсидә ишлитилидиған әслиһәләр болуп, су асти кемисидин су үстигә чиқириш яки айропиландин суға ташлаш үчүн қоллинилидикән. Хитай бундақ маторларни ишләпчиқиралмайдикән.

Тәптиш әмәлдариниң ейтишичә, бу хил кемини ишләпчиқиридиған америка завути мәсуллири яң яңға бензин билән һәрикәтлинидиған, техиму әрзан болған маторларни сетивелиш тәклипи бәргән болсиму, у һәрбий ишларда қоллинидиған көп хил йеқилғулуқ матор сетивелишта чиң турувалған. Завут мәсуллириниң ейтишичә, яң яң америка ширкәтлириниң ичкири хитайға мал сетип бәрмәсликидин әнсирәп, өзиниң херидарлириниң шаңхәйдә әмәс, бәлки хоңкоңда икәнликини ейтип ялған сөзлигән. Ге суңтавму у кемиләрни сетивелишқа қолайлиқ болсун үчүн, аввал хоңкоңдики бир ширкәт билән алақилишип, бу ширкәт арқилиқ америка завутиға 110 миң доллар салған. У йәнә бир хадимини хоңкоңға берип, у кемини вә маторни тапшурувелип, ичкири хитайға маңдурушқа әвәткән.

Хәвәрдә билдүрүлүшичә, ге суңтав бу җинайити билән көп болғанда 15 йиллиқ қамақ җазасиға һөкүм қилинидикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт