Bir xitay puqrasi amérikaning herbiy kéme mexpiyetlikini xitaygha yetküzüp bermekchi bolghanliq jinayiti bilen eyiblen'gen

Amérika birleshme agéntliqining 2-noyabir xewer qilishiche, bir xitay puqrasi amérikadin herbiy yel kéme sétiwélip xitaygha ewetmekchi bolghanliq jinayiti bilen eyiblen'gen.

50 Yashliq xitay puqrasi gé sungtaw 2-noyabir küni amérika fédratsiye sotida jinayitini iqrar qilip, amérikagha saxta éksport uchuri bergenlikini, déngizda meshghulat qilidighan hujumchi kéme we uning matorini aldamchiliq bilen xitaygha éksport qilmaqchi bolghanliqini éytqan.

Gé sungtawning iqrarnamisida éytilishiche, u shangxey wéyféng pen-téxnika cheklik shirkitining diréktori bolup, eyni chaghda uning amérikadiki xizmetchisi yang yang amérikadin bénzin, dizél yaki ayropilan yéqilghusi ishlitidighan mator seplen'gen hujumchi yel kémisidin 7 kémini zakaz qilmaqchi bolghan. Bu kémiler we köp xil yéqilghuluq matorlar amérika herbiy saheside ishlitilidighan esliheler bolup, su asti kémisidin su üstige chiqirish yaki ayropilandin sugha tashlash üchün qollinilidiken. Xitay bundaq matorlarni ishlepchiqiralmaydiken.

Teptish emeldarining éytishiche, bu xil kémini ishlepchiqiridighan amérika zawuti mes'ulliri yang yanggha bénzin bilen heriketlinidighan, téximu erzan bolghan matorlarni sétiwélish teklipi bergen bolsimu, u herbiy ishlarda qollinidighan köp xil yéqilghuluq mator sétiwélishta ching turuwalghan. Zawut mes'ullirining éytishiche, yang yang amérika shirketlirining ichkiri xitaygha mal sétip bermeslikidin ensirep, özining xéridarlirining shangxeyde emes, belki xongkongda ikenlikini éytip yalghan sözligen. Gé sungtawmu u kémilerni sétiwélishqa qolayliq bolsun üchün, awwal xongkongdiki bir shirket bilen alaqiliship, bu shirket arqiliq amérika zawutigha 110 ming dollar salghan. U yene bir xadimini xongkonggha bérip, u kémini we matorni tapshuruwélip, ichkiri xitaygha mangdurushqa ewetken.

Xewerde bildürülüshiche, gé sungtaw bu jinayiti bilen köp bolghanda 15 yilliq qamaq jazasigha höküm qilinidiken.