Xitay jasusliri filippinda ilghar üsküniler bilen herbiy uchur toplighan

“Manila waqti géziti” ning 21-yanwar xewer qilishiche, filippin da'iriliri xitay armiyesi bilen chétishliqi bolghan bir xitay puqrasi bilen ikki filippinliq shérikini jasusluq gumandari dep qolgha alghan. Ular filippinning muhim ul eslihe qurulushlirining ornini sizip, xitaygha teminlep bergen.

Filippin döletlik bixeterlik tekshürüsh idarisi (NBI) élan qilghan axbaratta déyilishiche, saqchilar mezkur jasuslarning mashinisigha mexpiy halda yer shari orun belgilesh sistémisi (GPS) ornitip we nazaret qilip közitish arqiliq ularning qilmishini éniqlap chiqqan. Ular filippindiki herbiy gazarma, éléktir istansisi, ayroport, déngiz porti, yerlik hökümet ishxanisi, hetta soda merkezliri etrapida aylinip, bu orunlarning tepsilatini 3D liq süret yollash téxnikisi arqiliq xitaygha yollighan. Filippin bixeterlik xadimliri bu süretlerning herbiy nishan yaki ademsiz uchqu (dron) larning hujum nishani üchün muhim uchur ikenlikini ilgiri sürgen.

Xewerde déyilishiche, xitay jasuslirining yuqiri téxnika arqiliq muhim ul eslihelirining orni, kölimi, qurulmisi heqqidiki uchurlarni igilishi endishe yaratqan. Chünki ular ishletken üskünilerni yiraqtin kontrol qilghili bolidiken hem toplighan uchurlarni xitayning chet eldiki jasusluq organlirigha yollighili bolidiken. Eger xitay armiyesi u uchurlarni qolgha chüshürüwalsa, mezkur nishanlargha bashqurulidighan bomba we rakétalarni qoyup béreleydiken.