Xitay da'iriliri chet el axbaratlirigha yene bir qétim “Jawab” berdi

Muxbirimiz eziz
2020.12.28

Xitay tashqiy ishlar ministirliqining bayanatchisi jaw lijyen 28-dékabir küni ötküzülgen muxbirlarni kütüwélish yighinida “Bir milyondin artuq Uyghur lagérgha qamaldi, dégen xewer pütünley ighwa. Shundaqla esir halqighan yalghanchiliq,” dédi. Shuning bilen birge buning amérika tashqiy ishlar ministirliqidiki bir qisim “Düshmen küchler” ning toqup chiqqan böhtanliri ikenlikini, amérikaning béyjingdiki bash elchixanisining mushu xil “Yalghan uchur” larni köplep tarqitiwatqanliqini tekitlidi. U muxbirlargha so'al qoyup: “Siler némishqa bizning bu heqtiki doklatlirimizni oqumaysiler?” dep so'al qoydi.

Xitayning “Yer shari waqit géziti” mu 28-dékabir küni bash maqale élan qilip “Amérikadiki düshmen küchlerning ‛500 ming Uyghur qolda paxta térish emgikige qatnashturulghan‚ dégen xewiri pütünley yalghan” dédi. Shuningdek bingtu'enlerde mashina arqiliq paxta térishning omumliship bolghanliqini, BBC agéntliqi muxbirlirining “Saqchilar we xitay emeldarliri bizning süretke élishimizgha tosqunluq qildi” dégen bayanlirining yalghanliqini “Pash qilghan”. Shu qatarda bérilgen “Mejburiy emgek” heqqidiki bayanlarnimu pütünley yalghan'gha chiqirip “En'gliye muxbirliri éytqan ehwal mewjut emes. Bu ‍uyghur yashlirining hemmisi ‛terbiyelesh‚ tin kéyin özlükidin emgek qilishni telep qilghanlar,” dédi.

Muhajirettiki analizchilar xitay hökümitining bu bayanlirini keskin tenqidlep: “Xitay hélihem milyonlarche Uyghurning lagérgha qamalghanliqini inkar qilip kelmekte. Mana bu heqiqi yalghanchiliq,” dédi. Yene beziler bolsa qolda paxta térishqa da'ir shunche köp sin höjjetlirining tarqilip yürgenlikini misal qilip “Xitay hökümiti herqachan taghdek pakitlarnimu inkar qilishqa adetlen'gen,” dédi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.