Xitayning Uyghur ayallirigha élip barghan jinayiti dawamliq xewer qilinmaqta

Tetqiqatchi adriyan zénizning Uyghur rayonidiki nopus qirghinchiliqi, jümlidin xitayning Uyghur ayallirini tughmas qiliwétish toghriliq teyyarlighan tetqiqat doklati 2-iyul élan qilin'ghandin kéyin xelq'arada gholghola qozghap, Uyghurlarning irqiy qirghinchiliqqa uchrawatqanliqidek bir pakitni dunyagha ashkarilidi shundaqla xelq'aradiki taratqularning muhim témisi bolup keldi.

2-Séntebir dunyagha dangliq taratqulardin bolghan “Yaxo tori” ning xewerler sehipiside “Xitayning Uyghur ayallirigha qilghan dehshetlik hujumi” namliq bir maqale élan qilin'ghan. Maqalide tetqiqatchi adriyan zénizning doklatida bérilgen uchurlar asas qilin'ghan bolup, xitayning bir meydan nopus azlitish herikitide asasliqi Uyghur ayallirini hujum nishani qilghanliqi, hamile qalghan ayallarning balisini chüshürüwetkenliki, heyz toxtitish dorisi bergenliki yaki tughmasliq opératsiyesi qiliwetkenliki qatarliq jinayetler körsitilgen.

Maqalide yene xitayning nechche on yildin buyan rehimsizlerche yürgüzüp kelgen we éghir derijide nopus tengpungsizliqini keltürüp chiqarghan pilanliq tughut siyasitini 2015-yil ayaghlashturghan bolsimu, emma Uyghur rayonidiki cheklimini kücheytkenliki, Uyghurlarning nopusini azaytish üchün aldi bilen ayallargha ziyankeshlik qilip, 2014-yildin 2018-yilghiche 80 pirsent ayalning baliyatqusigha tughut chekligüch salghanliqi tilgha élin'ghan.

Maqalining axirida xelq'ara jem'iyetning xitay kompartiyesini cheklep, uning Uyghurlar we bashqa milletlerge yürgüzüwatqan basturushini toxtitishqa, jümlidin xitayning Uyghur ayallirigha élip bériwatqan keng-kölemlik we qorqunchluq hujumini tosup qélishqa chaqirishi kérekliki alahide tekitlen'gen.