Хитайниң керийә наһийәсигә нурғун карханиларни йөткәп чиқип, йәрлик хәлқни ишлитиватқанлиқи мәлум болди

Мухбиримиз әркин
2020-05-08
Елхәт
Пикир
Share
Принт

Хитай һөкүмитиниң керийә наһийәсигә нурғун ушшақ карханиларни йөткәп чиқип, бу наһийәниң йәрлик аһалисини «намратлиқтин қутқузуш» намида ишқа селиватқналиқи мәлум болди.

«Хитай йәр шари телевизийә тори» ниң бу һәқтики бир хәвиридә илгири сүрүшичә, нөвәттә мәзкур наһийәдики деһқанлар деһқанчилиқни ташлап, бу наһийәгә қурулған карханиларда ишләшкә орунлаштурулмақта икән.

Хәвәрдә 2018-йили 12-айда керийәниң түгмән коча йезисида қурулған йемәклик завутида һазир 100 дәк деһқанниң ишләйдиғанлиқи, уларниң 71 нәпириниң тизимға алдурған намзат икәнлики тәкитләнгән. Хәвәрдә ашкарилишичә, мәзкур наһийәниң шәнбәбазар йезисида 70 миң квадрат метирлиқ бир җайға санаәт райони қурулуп, униңға һазирға қәдәр 4 тоқумичилиқ, кийим-кечәк карханиси келип орунлашқан. Мәзкур йезиниң партком секретари һазир бу йезида 3200 аһалиниң бу карханиларда ишләватқанлиқини билдүргән.

Мәлум болушичә, керийәдики бу карханиларниң һәммиси 2017-йилдин кейин қурулған. Хитайниң 2017-йили башланған чоң тутқунида 3 милйондәк мусулман тутқун қилинип, уларниң зор қисми бу карханиларда мәҗбурий әмгәккә селинишқа башлиған иди. Хитай һөкүмити уйғурларни ишқа орунлаштуруп, уларни «намратлиқтин қутқузуватқанлиқи» ни илгири сүрсиму, лекин чәтәлләрдики мутәхәссисләр хитайниң мәзкур пилани уйғурларни контрол қилиш, өзгәртиш вә ассимилятсийә һәрикитиниң бир парчиси икәнликини илгири сүрүп кәлди.

Пикирләр (0)
Share
Толуқ бәт