2018‏-Yili Uyghur rayonida xitay karxaniliri partlash xaraktérlik köpeygen

Muxbirimiz erkin
2019-01-11
Share

2018‏-Yili Uyghur aptonom rayon rayonida xitay karxaniliri partlash xaraktérlik köpiyip, yéngidin ottura-kichik tipliq 19 ming karxana peyda bolghan.

Alaqidar da'irilerning “Merkizi sheher istémalchilar géziti” ge bildürüshiche, ötken yili 170 ming adem bu karxanilarda ishqa orunlashqan. Mezkur uchur xitay shirketlirining Uyghur rayonidiki lagérlarda zawut-karxanilarni qurup, Uyghur tutqunlarni heqsiz yaki töwen ish heqqi bilen keng kölemlik mejburiy emgekke séliwatqanliqigha da'ir xewerler keng tarqiliwatqan mezgilde élan qilindi.

Yéqinda birleshme agéntliqi “Teyda” namliq bir xitay shirkitining xotendiki bir lagérda zawut qurup, kiyim-kéchek ishlepchiqarghanliqi, uning mehsulatining amérikigha import qilin'ghanliqini ashkarilighan. “Teyda” shirkitining mehsulatini import qilghan amérikidiki bajér namliq tenterbiye kiyimliri shirkiti tünügün bayanat élan qilip, Uyghur rayonidiki karxanilar ishlepchiqarghan mehsulatlarni import qilishni toxtatqanliqini élan qilghan. Buning aldida italiyediki “Zimistan” namliq diniy erkinlik tori, bezi xitay shirketlirining zawut-karxanilirini ghulja nahiyeside qurulghan “Jyafang ishlepchiqirish baghchisi” gha yötkep kelgenliki, lagérdiki tutqunlarning bu baghchidiki karxanilarda ishqa séliniwatqanliqini ilgiri sürgen.

“Merkizi sheher istémalchilar géziti” ning bildürüshiche, yerlik da'iriler Uyghur rayonida zawut-karxanilarning shiddetlik köpiyishini ishqa ashurushta iqtisadi bayliq tennerxini chüshürüsh, Uyghur élining jenubidiki 3 wilayet, bir oblastta emgek zichliqi yuqiri karxanilarni tereqqiy qildurush qatarliq siyasetlerni yolgha qoyghan iken. Xitay da'iriliri 2017‏-yilning bashliridin bashlap Uyghurlarni keng kölemlik yighiwélish lagérlirigha qamashqa bashlighan. Shuningdek yene “Ishlepchiqirish baghchiliri” namidiki yénik sana'et merkezlirini berpa qilip, nurghun toqumichiliq we kiyim-kéchek shirketlirining zawut-karxanilirini bu baghchilargha yötkep chiqqan idi. “Merkizi sheher istémalchilar géziti” ning ashkarilishiche, da'irilerning 2019‏-yilliq pilani bu yil yuqiriqidek emgek zichliqi yuqiri zawut-karxanilarni dawamliq köpeytip, 100 ming ademni ishqa orunlashturushni ishqa ashurush iken.

Uyghur kishilik hoquq teshkilatliri nöwette 3 milyondek Uyghur, qazaq we bashqa musulman milletlerning yighiwélish lagérlirida tutup turuluwatqanliqi, xitay da'irilirining ularni heqsiz yaki erzan emgek küchi süpitide mejburiy emgekke sélip, zor paydigha érishiwatqanliqini ilgiri sürüp kelmekte.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet